EZabbuli 139 - Bbaibbuli y'oLugwere

OMusengwa atumaite era atulabirira

Eeri akubbembera abembi. EZabbuli ya Dawudi.

¹ Oo Musengwa, waneekeenenyere era ommaite.

² Nʼowentyama era nʼowensetuka obba ommaite, nʼowoobba e yala nanze ebiseego byange obitegeera.

³ Owempuluka nʼowenyingira, ontegeera, omanya nabuli kimo ekinkola.

⁴ Nga nkaali nʼokubbutula ekibono, Musengwa obba okimaitiire nakimo.

⁵ Oneeruguulirirya oku mba gyonagyona, nʼonkuuma nʼamaanigo.

⁶ Okumanya okwo okwommaitemu kwewunyisya, kumbitiriireku, timpezya okukutegeera.

⁷ Yaina e gimpezya okwaba ni nzwa eeri oMwoyowo? Yaina e gimpezya okwirukira ni nzwa e gyoli?

⁸ Oweniina omwigulu, eeyo oliyo. Owenjika ni ngona e magombe, eeyo oliyo.

⁹ Nʼowenguluka ni mbitawo nʼe buzwaisana, ooba ni njaba ni ntyama e yala eino e bugwaisana,

¹⁰ nʼeeyo yona oliyo okunnungamya, era oliyo okumbeera.

¹¹ Nʼowensaba nti, “Dala endikiirya embuuneku, era ekitangaala ekineeruguulirye kisuuke ndikiirya,”

¹² nʼendikiirya yona tebba ndikiirya eeri iwe; nʼobwire buboneca ooti musana. Kwiwe endikiirya nʼekitangaala bifaanangana.

¹³ Niiwe owabbumbire ebitundu byange ebyʼomunda byonabyona, niiwe owayungayungire ebitundu byange ebyʼomubiri omu kida kya mama.

¹⁴ Nkuwuuja olwʼokubba wankolere mu ngeri etiisya era eyeewuunyisya. Ebikolebyo byewuunyisya ino, era ekyo nkimaitiire nakimo ino.

¹⁵ Owebabbaire bakola amagumba gange, nga bannyungayunga omu kida kya mama; owenabbaire nga nkulira eeyo omu mbiso, tikyabbaire kibise egyoli.

¹⁶ Wamboine nga nkaali okubba omu kida kya mama; enaku egyʼobwomi bwange gyonagyona, wagiwandikire omu kitabokyo nga gikaali nʼokutandiikaku.

¹⁷ Oo Kibbumba, ebyonseegaku nga byomugaso ino! Ebyonseegaku tibibalika!

¹⁸ Owemba kubibala, bikira omusenye obungi. Owendamuka mba nkaali ndi na iwe.

¹⁹ Oo Kibbumba, kadi singa oita ababbibabbi! Munzwerewo baiti inywe!

²⁰ Bakutumulaku kubbikubbi, abalabebo babona eriinalyo ngʼeritagasa.

²¹ Oo Musengwa, nga ncaawa abo abakucaawa, era nga nnyooma abo abakujeemera!

²² Mbacaawira nakimo ino, mbeeta balabe bange.

²³ Oo Kibbumba onkebere, kaisi otegeere ebiri omu mwoyo gwange. Onkeme, kaisi omanye ebiseego byange.

²⁴ Obone ooba nga ndimu ekibbikibbi kyonakyona, era onkubbembere omu nzirayo eyʼenkalaakalira.