EZabbuli 138 - Bbaibbuli y'oLugwere

Okwebalya oMusengwa

EZabbuli ya Dawudi.

¹ Oo Musengwa, nakwebalyanga nʼomwoyo gwange gwonagwona, ni nnyemba nga nkuwuuja omumaiso gʼabakibbumba.

² Nakotamyanga omutwe okukuwa ekitiisya nga nningiriire eeri eYeekaaluyo entukulye. Era nakuwuujanga olwʼokutakakwo okutakoma nʼolwʼobwesigwabwo, olwʼokubba wagulumairye eriinalyo nʼekibonokyo okukiraku ebindi byonabyona.

³ Oku lunaku owenakusabireku wanjiriremu, wanjiriryemu amaani nʼongumya.

⁴ Oo Musengwa, oleke abakabaka bonabona abʼoku kyalo bakuwuuje, olwʼokuwulira ebibono ebizwa omu munwagwo.

⁵ Oleke bembe oku bikwata oku manzirago, olwʼokubba ekitiisyakyo Musengwa, kyʼamaani!

⁶ Waire ngʼoMusengwa yagulumaire okukiraku nabuli kintu, afaayo oku bayeejere; Neye abʼamalala, yabeesamba.

⁷ Nʼowemba aakati omu bigosi, iwe okuuma obwomi bwange. Olwanisya abalabe bange abandiku ekisungu, nʼonnunula nʼamaanigo.

⁸ OMusengwa otuukirirya ebigendererwabye eeri nze; Oo Musengwa, okutakakwo okutakoma kubbeerererawo emirembe gyonagyona. Tiwandekesula nze oguwakolere.