EZabbuli 137 - Bbaibbuli y'oLugwere

Okwekunga okwabbaire omu busibe

¹ Oku miiga egyʼe Bbabbulooni twatyaime ni tukulumuca amaliga owetwebukiirye oSayuuni.

² Eeyo ni twanika amatongoli gaiswe, oku misaale egiriranirewo,

³ olwʼokubba eeyo abatuwambire batukobere tubembereku. Ababbaire batugadya ni batulagira tubasangaalyemu nga tubembera; ni batukoba bati, “Mutwembere olumo oku nyembo egyʼe Sayuuni.”

⁴ Twezya tutya okwemba enyembo gya Musengwa omu kyalo ekitali kyaiswe?

⁵ Owenakwerabira iwe Yerusaalemi, engalo yange endiiro ebba esaanira okwerabira okukubba otongoli.

⁶ Olulumi lwange lubba lusaanira kwekwatira ngulu mu munwa, owentakwebukirya, era owentatwala oYerusaalemi okubba eisangaalo lyange okukiraku ebintu ebindi byonabyona.

⁷ Oo Musengwa, oyebukirye aBeedomu ekibakolere oku lunaku oYerusaalemi owebakiwambiire, nga bakoba bati, “Mukisaanyewo, mukisaanyirewo nakimo paka nʼemisingi!”

⁸ Inywe abantu bʼe Bbabbulooni balibajigirica. Wʼenkabi oyo akusasula olwʼebyotukolere.

⁹ Wʼenkabi akwata eibyaireryo nʼalikubba okwibbaale!