EZabbuli 122 - Bbaibbuli y'oLugwere

Okuwuuja oYerusaalemi

EZabbuli ya Dawudi ngʼoniinaniina okwaba okusinza omu Yeekaalu.

¹ Nasangaire owebankobere bati, “Twabe omu nyumba ya Musengwa.”

² Atyanu tuli aanu, twemereire omunda oku geetiyo, iwe Yerusaalemi.

³ OYerusaalemi ikyo kibuga ekibombekere nga kigaite aamo.

⁴ Mwikyo niimwo ebika e gibyaba, ibyo ebika byʼabantu ba Musengwa, okwebalya oMusengwa, ngʼobweyalagiire oIsirairi.

⁵ Mwikyo niimwo omu bateekere entebe egyʼobwakabaka egyʼokulamuliraku, entebe egyʼobwakabaka egyʼabʼenyumba ya Dawudi.

⁶ Musabire oYerusaalemi abbeemu eidembe, muti: “Oganye abo abakutaka babbe idembe.

⁷ Eidembe libbe omu bikomerabyo, nʼobukuumi bubbe omu ngagagyo.”

⁸ Olwʼabantu bange nʼabakaagwa bange, nkoba oYerusaalemi nti: “Eidembe libbe mwiwe!”

⁹ Olwʼabʼomu nyumba ya Musengwa iye oKibbumba waiswe, nkusabira enkabi.