EZabbuli 121 - Bbaibbuli y'oLugwere

OMusengwa niiye atukuuma

EZabbuli ngʼoniinaniina okwaba okusinza omu Yeekaalu.

¹ Nsiirya amaiso gange ni nningirira ensozi, ni neebuulya nti, obubbeeri bwange buzwa yaina?

² Obubbeeri bwange buzwa eeri Musengwa, eYakolere eigulu nʼekyalo.

³ Tiyakulekenge okugwa, Iye oyo akukuuma tiyawongerenge.

⁴ Dala iye oyo akuuma oIsirairi tawongera, waire okugona.

⁵ OMusengwa niiye akukuuma, oMusengwa abba kumpi na iwe okukukuuma.

⁶ Eisana tiryakwocenge omusana, waire omweri okukukola obubbibubbi obwire.

⁷ OMusengwa yakukuumanga eeri nabuli kabbikabbi, yalabiriranga obwomibwo.

⁸ OMusengwa yakukuumanga amaaba nʼamaira, okuzwa atyanu, paka emirembe gyonagyona.