EZabbuli 12 - Bbaibbuli y'oLugwere

Esaala yʼobukuumi

Eeri akubbembera abembi. EZabbuli ya Dawudi.

¹ Oo Musengwa otununule, olwʼokubba abantu abatuukirirye bawoirewo, abantu abʼamazima tibakaali baboneka omu kyalo.

² Abantu babbeyangana, batumula ebibono ebiwaanawaana, neye ngʼomu myoyo gyabwe mwizwire bubbeyi.

³ Nsaba Musengwa, osirice abatumula ebibono ebiwaanawaana. Era obbuuneku eminwa gyʼabo abeepanka,

⁴ abo abakoba bati, “Ebibono byaiswe bitusunisya nabuli ekitutaka, twatumula ebitutaka, naani ayezya okutuloberya?”

⁵ Neye oMusengwa akoba ati, “Olwʼokubba abantu ababbibabbi bagadya abadoobi, era nʼabebagadya bakunga, nasetuka ni mbakuuma ngʼowebeetaaga.”

⁶ Ebisuubizo bya Musengwa byesigwa, biri ooti feeza egibakenenere nga bagibitya omu kikoomi kyʼomusyo, ni bagikengeiza emirundi musanvu.

⁷ Oo Musengwa otukuumenge, era otulabirirenge eeri ababbibabbi amirembe gyonagyona.

⁸ Ababbibabbi babitabita nabuli wantu, era nabuli muntu awuuja kibbikibbi!