EZabbuli 114 - Bbaibbuli y'oLugwere

Olwembo lwʼaBaisirairi nga bazwa e Misiri

¹ ABaisirairi owebazwire e Misiri, ibo eibyaire lya Yaakobbo owebazwire omwigwanga lyʼabanamawanga eryo,

² oBuyudaaya kyasuukire kifo kya Musengwa ekitukulye, oIsirairi ni kibba kyalokye okububwe.

³ Enyanza eNtukuliki oweyababoine nʼeiruka, omwiga oYoludaani ni gukangayo e nyuma.

⁴ Ensozi gyabuukabuukire ooti ntaama ensaiza, obusozi ni bucuulyacuulya ooti ntaama entonto.

⁵ Kyabbaire niki iwe nyanza okwiruka? Iwe Yoludaani, lwaki wakangireyo e nyuma?

⁶ Inywe ensozi, lwaki mwabuukabuukire ooti ntaama ensaiza? Nywena obusozi, lwaki mwacuulyacuulirye ooti ntaama entonto?

⁷ Iwe kyalo otukute omumaiso ga Musengwa, omumaiso ga Kibbumba wa Yaakobbo,

⁸ oyo acuusa eibbaale okubba kidiba kyʼamaizi, eibbaale erigumu ni libbaamu ensulo egikulumuka.