EZabbuli 112 - Bbaibbuli y'oLugwere

Enkabi gyʼomuntu omusa

¹ Muwuuje oMusengwa! Wʼenkabi iye oyo atya oMusengwa, era iye oyo asangaalira eino mu kugondera biragirobye.

² Abaanabe baabbanga bʼamaani oku kyalo. Eibyaire lyʼomutuukirirye lyabbanga lyʼenkabi.

³ Amakaage gaabbanga masuni era gakulaakulananga, era ebikolebye ebyobutuukirirye tibalibyerabira emirembe gyonagyona.

⁴ Omutuukirirye ekitangaala kimwakira nʼomu ndikiirya, olwʼokubba abba wʼekisa, era alumirwa, era mwenkanya.

⁵ Ebintu byabira nakusani iye oyo akola ebyʼekisa era akoopa abainaye, era omwenkanya omu byakola.

⁶ Mazima yaabbanga mucaati bulijo, era bamwebukiryanga emirembe gyonagyona.

⁷ Tatya okuwulira amawuliro amabbimabbi, omwoyogwe mugumu era yeesiga Musengwa.

⁸ Tatya, omwoyogwe mugumu, paka oweyalibona ati abalabebe babawangwire.

⁹ Agabira abadoobi nʼomwoyo gumo. Era ebikolebye ebyobutuukirirye tibalibyerabira emirembe gyonagyona, bamugulumalyanga ni bamuwa ekitiisya.

¹⁰ Ekyo omubbimubbi akibona ni kimusunguwalya, nʼanyayiya neye nga mpaawo kyokukola. Okusairirya kwʼomubbimubbi tikwatuukirirenge.