EZabbuli 11 - Bbaibbuli y'oLugwere

Okwesiga oMusengwa

Eeri akubbembera abembi. EZabbuli ya Dawudi.

¹ Nze njirukira eeri Musengwa okunkuuma, mubba mutya okunkoba muti, “Oguluke ooti nyonyi oyabe omu nsozi?”

² Olwʼokubba ababbibabbi bategere obulaso bwabwe, beebisire omu ndiikirya nʼobulaso bwabwe, nga bataka okulasa abalongoole omu myoyo.

³ Emisingi gyʼamateeka owegivunika, kintuki omutuukirirye ekyayezya okukola?

⁴ OMusengwa ali omu Yeekaaluye entukulye, oMusengwa ali oku ntebeye eyʼobwakabaka omwigulu. Alingirira abantu bonabona, era yeekeenenya ebibakola.

⁵ OMusengwa yeekeenenya ebikole byʼabatuukirirye, neye acaawa ababbibabbi abataka ebikole byʼobukambwe.

⁶ Ababbibabbi yabamagalicaaku amakala gʼomusyo nʼomusyo gwa salufa, nʼempewo yʼeibbugumu eribitiriri niibyo ebyabba omugabo gwabwe.

⁷ Ekyo kityo olwʼokubba oMusengwa mutuukirirye, era ataka bikole ebyʼobutuukirirye. Abalongoole omu myoyo balibba omumaisoge.