ENgero 10 - Bbaibbuli y'oLugwere

Engero gya Sulemaani

¹ Engero gya Sulemaani: Omwana owʼamalabuki, asangaalya oiteeye, neye omusirusiru anakuwalya omaaye.

² Obusuni bwʼobukumpanya, tibugasa; neye obwesigwa bununula omu kufa.

³ OMusengwa taleka omutuukirirye okubba munzalwa; neye akaisya ababbibabbi okusuna ebibeegomba.

⁴ Engalo ennafu gireeta budoobi; neye engalo eginyiikiira, gireeta busuni.

⁵ Akungula okweisana abba mwana wʼamalabuki, neye oyo agona omu biseera ebyʼamakungula, abba mwana aswaza.

⁶ Enkabi giizula oku mutuukirirye, neye omunwa gwʼomubbimubbi gwizula bukambwe.

⁷ Omutuukirirye bamwebukiryanga ngʼowʼenkabi, neye eriina lyʼomubbimubbi ligota.

⁸ Omuntu owʼamalabuki, aikirirya ebibamulagira; neye alabankana ebyʼobusirusiru yalijigirika.

⁹ Omuntu onambulaku ekyʼokumunenya, abba nakusani; neye omukumpanya, balimutegeera.

¹⁰ Oyo abisabisa amazima, aleeta obugosi; nʼoyo alabankana ebyʼobusirusiru, yalijigirika.

¹¹ Omunwa gwʼomutuukirirye nsulo yʼobwomi, neye ogwʼomubbimubbi gwizula bukambwe.

¹² Obucaawi buleeta enyombo; neye okutaka kuzweraku okusoniyangana ebibbibibbi byonabyona.

¹³ Omutegeeri ebyatumula, mubbaamu amalabuki; neye omugongo gwʼomusirusiru, gukaanya miigo.

¹⁴ Abantu abʼamalabuki, beebisira okumanya; neye omusirusiru ebyatumula, bimuleetera okujigirika.

¹⁵ Obusuni eeri abagaiga buli ooti kibuga ekiriku olugaga; neye obudoobi, niibwo obujigirica omudoobi.

¹⁶ Empeera yʼomutuukirirye emusunisya bwomi; neye omubbimubbi ebyasuna, bimuleetera kwonoona.

¹⁷ Oyo aikirirya okumubonereza, ali mu nzira yʼobwomi; neye oyo agaana okumunenya, aliiba.

¹⁸ Iye oyo abisa obucaawi, abba mubbeyi; nʼoyo atumula obundi oku mwinaye, abba musirusiru.

¹⁹ Omu kutumula ebibono ebingi, timudambamu ebisoba; neye asirika, abba wʼamalabuki.

²⁰ Entumula yʼomutuukirirye, ebba ooti feeza ennongoole; neye ebiseego byʼababbibabbi, bigasa katono.

²¹ Ebibono byʼomutuukirirye, bigasa bangi; neye abasirusiru bafa lwʼokudamba kumanya.

²² Enkabi gya Musengwa niigyo egigaigawalya, era tagigaitaku enima.

²³ Omusirusiru ekimusangaalisya, kukola bibbibibbi; neye omuntu omulabuki ekimusangaalisya, kukola byʼobutegeeri.

²⁴ Omubbimubbi ebyatya bimutuukaku; neye abatuukirirye ebibeetaaga babisuna.

²⁵ Ompunga owaafuwa, ababbibabbi bawaawo; neye abatuukirirye babbeerererawo emirembe gyonagyona.

²⁶ Ngʼenviinyo ensasaami owegiita amaino, era ngʼomwosi owegusaata amaiso, nʼomugayaali yena waabba eeri abo abamutuma.

²⁷ Okutya oMusengwa kuwangaalya omuntu; neye emyanka gyʼababbibabbi bagisalaku.

²⁸ Eisuubi lyʼabatuukirirye lizwamu eisangaalo; neye okusuubira kwʼababbibabbi, tikuzwamu kantu.

²⁹ Amanzira ga Musengwa lugaga lwʼabo abanambulaku kyokubanenya; neye abo ababbibabbi gabajigirica.

³⁰ Abatuukirirye tibasagaasaganenge; neye ababbibabbi, tibalibbeerererawo omu kyalo.

³¹ Omunwa gwʼomutuukirirye guzwamu byʼamalabuki; neye olulimi olubbeyi, balirusirica.

³² Abatuukirirye bamanya ebibasaana okutumula; neye ababbibabbi ebibatumula bicaamu.