ENgero 1 - Bbaibbuli y'oLugwere

Omugaso gwʼengero

¹ Engero gya Sulemaani okabaka wa Isirairi, omutaane wa Dawudi.

² Engero ginu gibbeera abantu okusuna amalabuki nʼokwega, gibabbeera okutegeera amakulu amainike agagirimu.

³ Era gyegesya amalabuki agʼokukola ebintu nʼamalabuki, okukola ebituuce nʼebyʼobwenkanya nʼokuteekubbira.

⁴ Giwa amalabuki abo ababisi, era gigeziwalisya abavuvuka.

⁵ Aale abʼamalabuki bagiwulisisye, beeyongere okwega, nʼabategeeri basunemu okubalungamya,

⁶ bategeere engero nʼebikobe ebyʼamakulu amainike, ibyo ebibono ebyʼabʼamalabuki nʼebikoiko byabwe.

Okulaabbira abavuvuka

⁷ Okutya oMusengwa, okumanya mu kutandiikira. Neye abasirusiru banyooma amalabuki, nʼebiragiro.

⁸ Mwana wange, owulisisyenge okulungamya kwa iteewo, era tiwalekanga okulaabbira kwa maawo,

⁹ olwʼokubba birongoola empisagyo ngʼengule owenyumisya omutwe, era ngʼamajolobero agʼomu mamiro oweganyumisya oyo agazwaire.

¹⁰ Mwana wange, abakola ebikole ebibbibibbi owebakusendasendanga, toikiriryanga.

¹¹ Owebakukobanga bati, “Oize watweyimbyeku; oize tugonerere omuntu tumwite, tuvumbiikirirye onambulaku omusango anambula nsonga.

¹² Oleke tubamalirewo nakimo ngʼamagombe owegakola abantu, abo nago aboomi yomo, tubasaanyewo babbe ooti baabo abaika e magombe;

¹³ twetwalire ebyobusuni byabwe byonabyona, twizulye amanyumba gaiswe omunyago.

¹⁴ Oize wena wetwegaiteku, twagabana ebitwanyaga.”

¹⁵ Mwana wange, tokolanga omukumbo nabo, tokwatanga amanzira gaabwe,

¹⁶ olwʼokubba tibeezizya okukola ekibbikibbi, babba bategeki kusuka musaaye.

¹⁷ Kubba kwedambya okutega omutego, ngʼonyonyi ogwotaka okupapalya akubona.

¹⁸ Abantu abo, babba beetega niibo abananyere, batega omutego ogwabapapalya niibo abananyere.

¹⁹ Kityo wekibba ku buli asuna ebintu omu bucaamu; ekyo kitwalisya obwomi bwʼoyo abisuna.

Okulabula eeri abanyooma amalabuki

²⁰ Amalabuki geeterera omu nguudo gyʼomu kibuga, gaaminkirira omu bifo abantu e gibakumbaanira omu kibuga.

²¹ Gatumula maaminkirira omu mansanganira omuli obuyoga, gatumulira e gibangirira omu kibuga.

²² “Inywe ababisi, mwalituuca di okutaka obubisi? Inywe abanyoomi mwalituuca di okusangaalira obunyoomi? Inywe abasirusiru mwalituuca di okucaawa okumanya?

²³ Singa mwawulisisyanga okunenya kwange, nabakoberanga ebiri oku mwoyo gwange, ni mbamanyikisya ebiseego byange.

²⁴ Neye olwʼokubba mwagaine okumpulisisya owenabeetere era ni watabbaawo afaayo owenabasimiirye,

²⁵ olwʼokubba timwateekereyo omwoyo oku kulungamya kwange kwonakwona, era nandi mwikirirya okunenya kwange,

²⁶ kale zena nalibasekerera ngʼakabbikabbi kabagwireku. Nalibajeeja ngʼakatyabaga kabagwireku.

²⁷ Ngʼakatyabaga kabagwireku ooti ikendi owa mpunga, akabbikabbi owekalibagwaku ooti gumpunga ogwʼamaani, enima nʼobugosi owebyalibagwaku.

²⁸ “Awo balinjeta, neye tinalibairamu; balinnoonia, neye tibalimbonaku.

²⁹ Ngʼowebagaine okwega, era ni basalawo okutatya oMusengwa,

³⁰ ngʼowebataikiriirye okulungamya kwange, era ni banyooma okunenya kwange,

³¹ kagira balirya ebineneka ebizwa omu bikole byabwe era ni baikuta ebineneka byʼenkwe gyabwe.

³² Ekyo kityo olwʼokubba obubisi bwʼababisi niibwo obubaita, era obutafaayo bwʼabasirusiru bwabajigiricanga.

³³ Neye nabuli ampulisisya yaabbangawo mwidembe, era yaabbanga mirembe, anambula kutya kabbikabbi.”