AbʼEbbulaniya 1 - Bbaibbuli y'oLugwere

OKibbumba atumwire kubitira mu Mwanawe

¹ Eira, oKibbumba yatumulanga nʼabazeiza baiswe emirundi nʼemirundi era omu ngeri enyingi ngʼabitira mu banaabbi.

² Neye omu biseera ebyaiswe binu ebyʼenkomerero atumwire na iswe kubitira mu Mwanawe, oguyalondere okuwa obusika bwa buli kimo, era oguyabitiiremu okubbumba ekyalo.

³ Mwiye niimwo okwasya kwʼekitiisya kya Kibbumba omu kweraga, era mwiye mutubonera enfaanana ya Kibbumba enanyere. Niiye abbesyawo buli kimo nʼamaani gʼekibonokye. Oweyamalire okutunaabyaku ebibbibibbi byaiswe, nʼatyama omwigulu nʼoKibbumba onyere oBwezye omu kifo kyʼekitiisya eino.

OMwana akira abamalaika ekitiisya

⁴ OMwana oyo ekitegeeza, oKibbumba yamusuucirye owʼamaani eino okukiraku abamalaika omu ngeri nti, ekitiisya ekiyamuwaire ekyʼokubba oMwanawe kikira ekyabwe.

⁵ Aale naani oku bamalaika oKibbumba oguyabbaire akobereku ati: “Oli Mwana wange, olwatyanu nnangirira nti ndi Iteewo?” Ooba ati: “Nalibba ninze oIteeye, yena nʼabba Mwana wange?”

⁶ Kaisi tete era, oKibbumba oweyabbaire yatira okusindika oMwanawe omubere oku kyalo, yakobere ati: “Abamalaika ba Kibbumba bonabona bamusinzenge.”

⁷ Owaabba atumula ku bamalaika, oKibbumba akoba ati: “Asuuca abamalaikabe ooti mpewo, era abaweereryabe ooti ndimi gya musyo.”

⁸ Neye owekituuka oku Mwanawe, oKibbumba akoba ati: “Obwakabaka oKibbumba obwakuwaire bwakubbaawo emirembe nʼemirembe. Okufugakwo omu bwakabakabwo kutambulira ku bwenkanya.

⁹ Otaka ebikole byʼobutuukirirye, nʼocaawa obubbibubbi. Kagira nze oKibbumba, oyo oKibbumbawo nkusukireku amafuta ni nkuwa eisangaalo erikira eryʼabandi bonabona.”

¹⁰ Era oKibbumba yakobere ati: “Iwe Musengwa niiwe omu ntandiika eedi eyakomekere omusingi ekyalo oku kyemereire, era nʼeigulu niiwe onyere eyalibbumbireyo.

¹¹ Ebyo ibyo byalijigirika ni biwaawo, neye iwe oli wa kubbaawo emirembe nʼemirembe. Byonabyona byalikairira ni biwaamu ngʼekizwalo.

¹² Walibiringaku ngʼowebalingaku eijoola, era byalicucuka ni bicuuka ooti kizwalo ekikaire owekicucuka. Neye iwe osigala kyekimo, era tocuukaku, era nʼobwomibwo tibwalikoma.”

¹³ Neye aale naani oku bamalaika oKibbumba ogwakobangaku ati: “Otyame ngʼondiraine oku lubba lwange olwʼengalo endiiro, paka owenaligondya abalabebo ni mbasuuca mukonkolo gwʼokuwuumuliryaku ebigerebyo?”

¹⁴ Neso abamalaika nago niikyo eniki? Aale tiniigyo emyoyo gyonagyona egiweererya oKibbumba, egyo egyatuma okubbeera abo abalisuna okubalokola?