Tateta 25 - Buki Kimaasabaina

Yauwe ina Kaba Kaiyaka ( ) Yauwe ina Kaba Kaiyaka yoyou ana yógana

¹ E ilatuwokoigu idigo kana,

² ‘ kulatuwokōidi latuwogu idi vininabeso sikabidi simedi sikasaledi yau yaigu. Avatau neta ina vininabeso itagone, e kukābi.

³ Vininabesoyadi bei kwabidi ame nakae: be nakae kopa,

⁴ búyala noyanoyaidi buruu, kalaakovidi toidi be nakae kayakayaidi. Nakae areko dedevidi toidi, unuunudi,

⁵ bolamo sakavaidi go, sakavayadi bogina sikaredi kayakayaidi. E nakae tomadao sakavaidi, gaigíyala,

⁶ ma mainina dedevina.

⁷ E gurewa esaaesaidi yoidi ana kwama manuna. Kwamayadi aiyuwo, tayamo tolobona ana kwama manuna, e tayamo kasikasina ana saisaira manuna.

⁸ E kulatuwokōidi latuwogu guna kaba kimasaba siyowo, e bei yaimi goi akaaiyaka.

⁹ Nakonakae guna Kaba Kaiyaka yoyou ma konanina liliudi makayaudi bei avatulukoim, e tauna nakae kutapatēdi go, Isileli tubunao kuvatulukōidi simadagidi.’

Vatulúkwana aba vatulúkwana dedeogaina ana madágina manuna

¹⁰ E Yauwe tuwaina kana, ‘Tomota kulatuwokōidi latuwogu gaigíyala taalaidi sikabidi, dedeoga tayamo bei simadagi. Ana mamanao panetayataya aba katugúyala go, ana papaeva panetayataya go, ana tukotuko panetayataya.

¹¹ Ikavava, goura maavadaina sikabi sikaupapaeve, e dedeogayana goi bei sikaupatuko, tauna dedeogayana toluyena be sinaena goura. Ikavava, ana papa kinababaina goi goura bei sikaupatuko.

¹² Ikavava, goura aivasi bei simadagidi, matakubuna aivasi goi siyatoidi, dadava aiyuwo, dadava aiyuwo.

¹³ Ikavava, aitakeo aiyuwo gaigíyala bei sibobóidi go, goura paaevaidi sikabidi aitakeoyadi goi sikaupatukoidi.

¹⁴ Ikavava, riniyadi goi sivaisiudi bei itoboinedi dedeogayana sikaitakeve.

¹⁵ Aitakeoyadi bei sikaiyako vata dedeoga ana rini goi. Taabu sibuuyagīdi.

¹⁶ moe gurewa aiyuwo goi aaginidi bei avinim, e dedeogayana sinaena goi kudodōidi sikaiyaka.

¹⁷ E tomota kulatuwokōidi latuwogu goura maavadaina sikabi, dedeogayana ana katukábwala simadagi. Atukabwalayana moe aba núwala. Aba nuwalayana ana kakainaki ame nakae: Ana mamanao panetayataya aba katugúyala go, ana papaeva panetayataya.

¹⁸ Ikavava, goura bei situtu, aiyuwo simadagidi tokwalu nakae. Simadagidi ikavava, bei aba núwala yatana goi siyatoidi,

¹⁹ tayamo matakubuna, tayamo matakubuna goi sipakitaoidi. Tauna aba núwala yatana goi tayamo dadavina, tayamo dadavina.

²⁰ Yábana ana tomatakavatayaoyadi ma panepanedi bei simadagidi go, panepanediyadi siyosaledi, e aba nuwalayana bei sitakabobo bei simataakavate. Adi taiyuwo matana matana sikaaiyaka go, sikandosobu aba núwala sigitegite.

²¹ Simadagidi ikavava, aba vatulúkwana moe lovina yawou gurewa goi aaginidi bei avinim go, kom kudodōidi dedeoga sinaena goi sikaaiyaka. Ikavava, aba núwala bei sikabi, dedeoga yatana sikailagasi.

²² Aba nuwalayana yatanaina goi yábana ana tomatakavatayao adi taiyuwo nauyayanaidi bei avalobodem. Amoko goi bei alatuwokoim guna lovina liliudi Isileli tubunao manudi.’

Vatulúkwana teboro ana madágina beredi manuna

²³ E Yauwe tuwaina kana, ‘Tomota kulatuwokōidi latuwogu gaigíyala taalaidi bei sikabidi, teboro tayamo simadagi. Teboroyana ana kakainaki ame nakae: Ana mamanao panetayataya kasikasi go, ana papaeva aba katugúyala go, ana tukotuko panetayataya.

²⁴ Go teboroyana goi goura maavadaina go, paaevaidi sikaupatukoidi. Ikavava, kinababaina goi ana papa goura bei sikaupatuko.

²⁵ Sikaupatuko ikavava, teboroyana yatana goi tupaota goura siyatoidi ivaníbita. Tupaotayadi adi tukotuko nimakulemwasi tayamo. Go tupaotayadi goi ana papa goura sikaupatuko.

²⁶ Ikavava, rini aivasi goura maavadaina simadagidi, teboro matakubuna aivasi goi siyatoidi.

²⁷ Tupaota kikina go, sobuyekoina riniyadi sikaaiyaka bei aitakeo goi teboroyana sikaitakeve.

²⁸ Rini siyatoidi ikavava, e aitakeoyadi gaigíyala aiyuwo sibobóidi, goura paaevaidi goi sipaimidi go, gourayadi sikaupatukoidi.

²⁹ Ikavava, e goura maavadaina sikabi, teboroyana ana noko, insensi ana pereiti, teboroyana ana botori be ana borodisi simadagidi. Botoriyana be borodisiyana moe imi vininabeso manuna.

³⁰ Latuwogu tuta liliuna teboroyana yatana kimaasabaidi yau umagu matagu goi siiyatoidi.’

Vatulúkwana rampa adi kaba yata ana madágina manuna

³¹ E Yauwe tuwaina kana, ‘Tomota kulatuwokōidi latuwogu goura maavadaina sikabi situtu, e rampa adi kaba yata bei simadagi. Aba yatayana alova maisiyana, tauna sipona, tolobona, unana, gadona be nakae senina vagana simadagidi go, madabokina ana lamgógana goura tayamo.

³² Go laonina nakae ainima tayamo tolobona goi simadagidi situko, dadavina aito, dadavina aito.

³³ Senina vagana ma gadona aito laoninayadi tamo tamo goi bei sikaaiyaka. Seninayadi taniya maisiyana.

³⁴ Go rampa adi kaba yata tolobona goi senina vagana ma gadona aivasi bei sikaaiyaka.

³⁵ Nako goi laonina sisowóduwo tolobona goi, e senina vagana ma gadona bei sikaaiyaka.

³⁶ Go senina gadonayana be laoninayana goura maavadaina situtudi go, ana lamgógana goura tayamo.

³⁷ Rampa adi kaba yatayana manuna rampa giyaidi ainima aiyuwo bei simadagidi. Ikavava, rampa adi kaba yata sipona yatadi goi siyatoidi, e bei rampa adi kaba yata matana goi imavada.

³⁸ Go ina wiki ana kaba kalikaina be nakae ana noko moe goura maavadaina goi bei simadagidi.

³⁹ Go goura mavadainayana ana moumou nakae kilo ana badabada teti (30) bei sikabi rampa adi kaba yata be nakae konanina adi madágina manuna.

⁴⁰ Go am dodōkana bei dogoiyadi boi mainao koya goi bogina avatulukoim, e tauna nakae kutapatēdi.’