Tateta 17 - Buki Kimaasabaina

Isileli tubunao aiyuwoina sikaukuulukúluwo bwae pasina tetelina

¹ E kai ilatuwokoima. Kakanaliya kana asa Rapidim goi katunagu. Ego amoko goi bwae geya.

² Tuwo tomotayadi sikaumakimaki yaigu, sidigo kadi, ‘Bwae kuvanīmma!’ Go yau adigo kagu, ‘Kaga unana kokaumakimaki yau yaigu? Kaga unana Yauwe kovakakone? Nakona Yauwe geya konumiseyeta!’

³ Go kidi maedi siyápasa toina, e sikaukulukúluwo yaigu sidigo kadi, ‘Ame manakae Itipita goi kumema? Bego natumao be ima yoguyoguyao taiyao maema adi yápasa goi kukimatema?’

⁴ E atumadádana Yauwe yaina adigo kagu, ‘Ame tomotayadi bei manakaegu avekoidi? Giyakainava bei gurewa goi sikaumategu.’

⁵ Yauwe idigo kana, ‘Im kaituko boi sákala Nairi kusapisapi kwābi, e nakae tomoyamoya Isileli tubunao yaidi goi kukinavēdi kwabīdi taiyao kōna tomota liliudi matadi goi.

⁶ Kunōve. Yau bei matam goi aataoya, amoko gurewa yatana Koya Korevi goi. E gurewayana kulāui, e bwae bei idau go, tomotayadi itoboinedi sinim.’ Tuwo nakae aguinuwe. Tomoyamoyayadi matadi goi ataoya, gurewayana alaui, e bwae idau.

⁷ Tuwo asayana avayou Mesa be Meriba unana boi Isileli tubunao sikaumakimaki be nakae Yauwe sivakakone tutayana kadi, ‘Seki Yauwe ikaaiyaka yaida o geya?’ Tauna you aiyuwo avini.

Isileli tubunao sivaayaviya Amaleki ina bodao taiyao tetelina

⁸ E Amaleki tubunao sima Rapidim goi Isileli tubunao taiyao sivayaviya.

⁹ E tuwo Iyosuwa alatuwoko adigo kagu, ‘Kūna koroto kukinavēdi yaviya manuna. Ikavava, itomo taiyao kōna Amaleki tubunao taiyao kovayavīya. Yau bei koya yatana goi aataoya go, Yaubada ina kaituko nimagu goi ayoyoisi.’

¹⁰ Tuwo Iyosuwa iguinuwa kaga nakae bogina adige. Korotoyadi taiyao sina sivayaviya Amaleki tubunao yaidi. Kai go , Kure be yau katuko kana koya yatana.

¹¹ Tutayana nimagu akatulagasidi, e Isileli tubunao sitogaga go, neta nimagu akatusobuyedi, e kidi Amaleki tubunao sitogaga.

¹² E nimagu bogina sineneta, tuwo Eroni be Kure sina gurewa gagaina sipuli sime siyato guna kaba tusobu. Tuwo yatana atusobu go, tauyadi nimagu sikatulagasidi sikalipaiwolidi, tayamo dadavina, tayamo dadavina. Tauna nimagu sikasa ana kadókana níyala isaliu.

¹³ Tuwo Iyosuwa mana tovayaviyayao sitogaga, e Amaleki tubunao sisi goi sivasobusobuyedi.

¹⁴ E yaviya ikavava, Yauwe ilatuwokoigu idigo kana, ‘Buki goi livala ame kugīni namlieta kwatuyāivi bei Iyosuwa inove. Livalayana ame nakae: Amaleki tubunao valedi bei poyapoya ame goi atauwedoko.’

¹⁵ Tuwo dídiya akaudakodako manuna go, aba kasalayana avayou Yauwe Guna Bísala.

¹⁶ Adigo kagu, ‘ ina bísala takatulagāsi! Tauyana bei ivayaviya vata Amaleki tubunao yaidi.’