Taito 2 - Buki Kimaasabaina

Tonumisayao idi sinapu Tomoya ana totugugunayao idi gúguna goi

¹ E kom sem tonumisayao tuta liliuna kulatuuwokōidi ava sinapuva itoboinedi sisabokuliyedi nakae vatulukwana dókana idige.

² Sinapuyadi ame nakae: Tomoyamoyayao kulatuuwokōidi idi vikaiya sikabikunuidi, idi sinapu aba wowoina be nakae idi sinapu sikabikunuīdi. Aiyuwoina kulatuuwokōidi madi salau sivadókana ame dogoiyadi goi: Idi numisa goi, idi goi be idi mesayágana goi.

³ Kidi go namoyamoyayao nakae. Kulatuuwokōidi idi sinapu nakae tomota kaasalaina Yaubada umana itoboine. Ame nakae: Taabu siitagīwaya be nakae taabu sinim monaamonāna. Tauyadi idi bóbwara be idi guinuwa goi naiwovau sivatuulukoidi kaga dedevina.

⁴ Idi vatulúkwana bego naiwovauyadi sikatuliwoledi monediyao be natudiyao simatakooiyedi,

⁵ idi sinapu sikabikunuidi, geya adi goyomo, idi vada simatakavatedokoidi be nakae sikatetagonedi toinidi monediyao yaidi. Tauyadi nakae itoboinedi siguinuwe bego geya tuwaina Yaubada ina valena moe aba tagíwaya.

^6-7 Kidi go tubuwau matuwo nakae. Kukatuliiwolēdi idi bóbwara be idi guinuwa liliudi goi idi sinapu sikabikunuidi. Kom go im guinuwa dedevidi goi kuvagiitakōim kom tomota adi kaba kinana. Tutayana kuvaatulúkwana, atem maavadaina nakae im sinapu aba wowoina go,

⁸ valayana kuvaatulúkwana itoboine moitamo nakae geya ana pikwanamo. Moe bego ida kaleyayao kugieomaemaedi unana geya tayaamo kaga goi itoboinedi kom be yau sikaogoyoeda.

⁹ Kidi go , e kukatuliiwolēdi kaga liliuna goi sikatetagonedi toinidi adi tomoyamoyayao yaidi. Tauyadi sipoikíkina adi tomoyamoyayao sivauyaonedi ame nakae: Taabu madi kapipilova sikaubodabōda,

¹⁰ adi tomoyamoyayaoyadi yaidi goi taabu sivaaināwana, go sem itoboinedi idi guinuwa madabokina goi be idi bóbwara madabokina goi sivagitakoidi kidi aba numisa toina adi tomoyamoyayaoyadi yaidi. Moe nakae idi sinapu bego idi guinuwa liliudi tomota sigitedi bei vatulúkwana Yaubada ada Toyava manuna nuwodi ikabi.

¹¹ Moe moitamo. Yaubada ina kanuwóiya bogina ikaiwoduwe go, anuwoiyayana goi tomota liliuda ada yava tababane.

¹² Anuwoiyayana ivatulukoida bego ida kaoliliwo Yaubada yaina be nakae poyapoya sinapuna ana yalagau takalavedi go, tuta ame taketoiya ame nakae: Ida sinapu takabikuunuidi, taakibóbwata go, taaketoiya nakae Yaubada iuyaone.

¹³ Nakae taketōiya unana mada lotuta taatuyáwata dogoi tayamo ada dedevina manuna. Dogoiyana moe .

¹⁴ Tauyana toinina ikasale ámasa goi, kita ada katumapu, bego ida kapipilova tamo tamo goi itateteda. Aiyuwoina ikimavadeda bei kita Tauyana ina toinina umana, mada salau latuwoda guinuwa dedevidi taguinuwedi.

¹⁵ E mam lovina moe dogoiyadi tomota kulatuwokōidi be kuliwolēdi siguinuwedi go, neta dogoiyadi sikataedi, kukamamaetalidi. Go taabu tomota sikapipiilavēm!