Pilipai 2 - Buki Kimaasabaina

Paulo ina lovina da Pilipai idi spwagógana be idi nuwonúwana manudi

¹ E tuwo nuwomi tayamo manuna bei alatuwokoimi. Kita spwagoogonida bogina takabivekovekoe ae? U, nakae. Yaubada ina yabobona be ina nuwokapisi bogina talotowoidi ae? U, nakae.

² Tauna kovauyaonedokōigu ame nakae: Mami nuwoovavāsa, mami matakooi vavāsa semiyao yaidi, kooebōda tayamo be nakae nuwomi tayamo.

³ Geya tayaamo kaga amitava imi yala manuna o nuwatue goi koguuinūwe, go sem mami nuwootokai konuwonūwana semiyao sitaoyakukuyuimi.

⁴ Taabu amitava ami dedevina manuna konuuwonūwana, go sem semiyao adi dedevina manudi konuuwonūwana.

⁵ Moe nuwonuwanayadi yaimi goi koyoisikavatēdi unana nuwona goi nakae iyoisikavatedi. Tauyana ina sinapu ame nakae:

⁶ Tauyana Yaubada ana tapata, e Yaubadayana taiyao sivavasa go, tuwo geya inuwonuwoneta bego idi vavasayana iepaisewe toinina ana dedevina manuna.

⁷ Go sem kebana esaaesaina goi toinina ikisobuye ame nakae: Tomota idi adi tapata ikote, e ibíbina tomota maisiyadi. Tuwo Tauyana kita tomota nakae

⁸ go, toinina inuwotokai ame nakae: Yaubada ikabikaonedoko go, ina kabikawanayana goi toinina ikasale ikámasa! Ego ina kamasayana kerose goi moe aba omayamaya!

⁹ Tauna Yaubada ikilagasi toina be nakae you gagaina ivini go, youyana you liliudi ikalisavedi.

¹⁰ Moe nakae iguinuwe bego youyana ivinivini goi da yábana be da poyapoya be nakae tokámasa liliudikova aedi sivatugúyala Yeisu yaina goi

¹¹ be nakae Yeisu sikatomoyae bego kina Tomoya. Moe Yaubada ana taimámina manuna.

¹² Tauna guna kaloyao, boi tuta liliuna kokabikaaonegu, e ame tuta nakae go, imi kabikawanayana geya kada guna kaiyako yaimi pasina kokaabikáwana geya, go sem geya akaiyaketa yaimi goi go, imi kabikawanayana kokidedēde. Nakae bogina kokabikáwana mami matoita be mami malitatátava Yaubada matana goi toinimi ami yava keuwoina kovagitakōe.

¹³ Moe itoboinemi. Yaubada mana togaga yaimi ipaaisewa go, ina paisewayana pasina ina nuwonúwana koyale koguinuwe be nakae ami toboine koguuinuwe nakae Tauyana latuwona.

¹⁴ Kaga liliuna koguuinuwedi geya imi kaukulukuluwomo be geya imi kaumakimakimo koguuinuwēdi

¹⁵ bego komi geya ami pikwanamo be nakae imi sinapu maavadaidi, nakae komi Yaubada natunao geya imi bagalamo tomota sulaaigidi be toogoyoidi nauyayanaidi goi. Imi kaiyaka yaidi goi komi utuna nakae koninínima poyapoya ame goi

¹⁶ unana ina Maliyalina goi yau itoboinegu aedidigu bei asamolai bego guna paisewa yaimi goi vavalákuna nakae geya kada alokoina besobeso o guna poisógana yaimi goi geya keuwoinamo geya.

¹⁷ Go sem bei auyáwana ida gedageda vavasa pasidi. Gedagedayadi vininabeso yau vininabeso oine nakae ikaliulagigu yatami, e guna kasala Yaubada yaina manuna auyáwana, nakae komi imi kasala Yaubada yaina manuna auyáwana komi taiyao.

¹⁸ E komi nakae. Kouyāwana yau taiyao!

Timoti valena

¹⁹ E neta ida Tomoya Yeisu ina nuwonúwana nakae, e alotuta giyakainava Timoti aetune iwo yaimi bego valegu konove, e atemi ivapatupatudi go, yau nakae ategu ivapatupatu tutayana tauyana ikaluvilamna ima valemi ilatuwokoigu.

²⁰ Geya vatau tayaamo tauyana nakae yaigu goi ikaaiyaka. Tauyana anetava atema tayamo go, moitamo inuwonúwana gagaina komi ami dedevina manuna yau nakae.

²¹ Moitamo tauyana anetava. Boda liliuudi toinidi adi dedevina sisokikine go, Yeisu ina nuwonúwana manuna geya, tauna geya itoboineguta aetunedi siwo.

²² E Timotiyana ina sinapu dedevina bogina koyagoi bego tauyana ivaitegu Vala Dedevina manuna nakae gómana tayamo neta tamana taiyao sipaaisewa.

²³ Tauna tutayana agite kaga bei isowóduwo yau yaigu, e alotuta bei tauyana mainao aetune iwo yaimi.

²⁴ E anumisa ida Tomoya yaina bego yau nakae giyakainava bei ao.

Epapirodito valena

²⁵ E anuwonúwana bego itoboine Epapirodito aetunemnei iwo yaimi. Tauyana siyagu, guna tosavaiyuwo be nakae tovayaviya tayamo yau taiyao Vala Dedevina ana vabodaboda manuna. Ego tauyana boi koetune ima imi yabobona ivinigu. Tauyana imi be nakae imi katumapu yau yaigu, e ivaitegu.

²⁶ Latuwogu tauyana aetune iwo yaimi unana liliumi ikatukuwonemi be nakae manumi inuwokubukubu unana livala konove bego ikatówana.

²⁷ Moitamo toina tauyana ikatówana gagaina, nakae giyakainava bego ikámasa go, geya ikamaseta, go sem Yaubada inuwokapisiye. Ego geya kada tauyana anetava inuwokapisiye geya, go sem yau nakae inuwokapisiyegu, govila bei guna nuwomou ivakaigaga.

²⁸ Tauna latuwogu toina tauyana aetunemnei iwo yaimi bego tutayana kogitemnei, kouyáwana go, yau guna nuwokubukubu bei giyaina isou.

²⁹ E tauna ida Tomoya taiyao pasina tauyana mami uyáwana kouyaōne go, avatauwa neta ame tauyana nakae, kowowoinēdi.

³⁰ Tauyana kouyaōne unana ina guinuwa manuna boi giyakainava ikámasa unana tauyana inuwoupa bego ivaitegu. Vaitayana komi geya itoboinemita kovinigu unana aduwanau goi kokaaiyaka. Tauna tauyana kouyaōne.