Nuwogau 7 - Buki Kimaasabaina

Yaubada ina katukatu Isileli tubunao 144,000 dabadi goi sikaupakiyedi

¹ Amo dogoiyadi bogina sikavava, adi taivasi agitedi poyapoya ana dadava; dadavavasi goi siitaoya go, yágira aivasi siyooisidi bego yagirayadi geya itoboinedita sitowo poyapoya goi, négwasa goi be alova goi.

² Ituli ta anerose agite bomatu dadavina goi ituko ima go, tauyana Yaubada maa yawoina ina katukatu ana kaba láuwo iikavale. Niyana gagaina goi iduduwo, aneroseyadi adi taivasi madi tagona poyapoya be négwasa sibuugoyaidi, e ilatuwokoidi

³ idigo kana, ‘Taabu poyapoya, négwasa be alova kobuugoyāidi ana kadókana ida Yaubada ina dabadi goi katukatu bogina kakaupakiyedi!’

⁴ Tuwo tamo tamo goi ame nakae:

⁵ Dala Yuda goi tuwero tausani (12,000). Dala Rubeni goi tuwero tausani (12,000). Dala Gadai goi tuwero tausani (12,000).

⁶ Dala Aseri goi tuwero tausani (12,000). Dala Napatali goi tuwero tausani (12,000). Dala Manase goi tuwero tausani (12,000).

⁷ Dala Simioni goi tuwero tausani (12,000). Dala Livai goi tuwero tausani (12,000). Dala Isakara goi tuwero tausani (12,000).

⁸ Dala Sebuloni goi tuwero tausani (12,000). Dala Iyosepa goi tuwero tausani (12,000). Dala Beniyamina goi tuwero tausani (12,000). Tauna nakae madabokidi katukatuyana dabadi goi sikaupakiyedi.

Boda liliudi siyapali Yaubada yaina

⁹ Amo dogoiyadi sikavava, e akandobala boda gagaaina agitedi. Geya vatau tayaamo itoboine ikatuyaividi. Tauyadi aba lovina tamo tamo goi, dala tamo tamo goi, boda tamo tamo goi be aníyana tamo tamo goi sima kébana esaaesaina matana goi be nakae matana goi siitaoya. Tomotayadi madi kwama maanawedi be poowoudi go, nimadi goi magimagi libidi siyooisidi.

¹⁰ Tauyadi niyadi gagaina goi siiduduwo sidigo kadi, ‘Ida Yaubada goi, Tauyana kebana esaaesaina goi itulagalaga, be nakae Lamiyana goi ada yava tababane!’

¹¹ Kidi go aneroseyadi liliudi kébana esaaesaina, tomoyamoya be nakae dogoi maa yawoidi adi taivasi sitaoyaakobudi go, Yaubada kebana esaaesaina matana goi aedi sivatugúyala Tauyana yaina sisakululu,

¹² sidigo kadi, ‘E nakae! Ida Yaubada aba yapali, aba taimámina, tonanamsa, aba kauyagu, aba wowoina, totogaga be nakae tokalika ame tuta be nakae tuta simamaima! E nakae!’

¹³ Tomoyamoya yaidi goi tayamo ilumadadegu idigo kana, ‘Amo tauyadi adi kwama maanawedi be poowoudi avatauwa? Nako goi sima?’

¹⁴ ‘Guna tomoya, kom bogina kuyagoi’, kaegu. Tauyana idigo kana, ‘Amo tauyadi mou gagaina ana tuta goi sitogaga. Adi kwama maanawedi Lamiyana ikaikaina goi bogina sinikidi sipopowou.

¹⁵ Moe pasina Yaubada kebana esaaesaina matana goi sikaaiyaka go, ina Vada Kimaasabaina sinaena goi sitaaimámina maliyalina be sabamgo. Tolovina kebana esaesainayana goi itulaagalaga bei ivainuugonedi.

^16-17 Tuwo Lamiyana kebana esaaesaina kikina goi iitaoya moe adi tomatakavata. Tauyana bei ivakededi sina bwae maa yawoina goi sinim be nakae Yaubada mataiudi bei isekukudi. Tauna geya tuwaina bei loga o dava sikamakámasa be nakae geya tuwaina níyala o yaviyavi silootowoidi.’