Nuwogau 19 - Buki Kimaasabaina

Yapali be uyáwana yábana goi

¹ Moe dogoiyadi sikavava, e níyana tayamo anove ana taiyakeka nakae neta boda gagaaina niyadi gagaina yábana goi siiduduwo sidigo kadi, ‘ tayapalīye! Ida Yaubada ina yava, ana be ina togaga ivagitakoedi!

² Ida yapaliyana unana ina takínona kivaavasaina be mooitamoidi. Ina takinonayana ame nakae: Tomatagogoli gagaina boi ina masisi goyogoyoina goi da poyapoya ibugoyaidi, tuwo Yaubada itakino toogoyoina. Tomatagogoliyana nimana goi Yaubada ina ikaikaidi sikaaiyaka, tuwo Yaubadayana ikatumapu. Tauna Tauyana ina takinonayana pasina tayapalīye!’

³ Tuwo aiyuwoina niyadi gagaidi goi siduduwo sidigo kadi, ‘Yauwe tayapalīye! Amo asayana ana kaigabu pasina aubowoina ituko vata.’

⁴ Tuwo tomoyamoyayadi tuwenti poa (24) be nakae dogoi maa yawoidi adi taivasi aedi sivatugúyala Yaubada kebana esaaesaina goi itulagalaga sisakululu, sidigo kadi, ‘E nakae! Yauwe kayapaliyem!’

⁵ Ikavava, níyana tayamo kébana esaaesaina goi anove idigo kana, ‘Komi liliumi, Yaubada ina pakonayao be ana totaimaminayao, nakona youtagau o maa yoimi, ida Yaubada koyapalīye!’

⁶ Amo ikavava, níyana tayamo anove ana taiyakeka nakae neta boda gagaaina siiduduwo o nakona bwae badabadaidi sidududu butukaodi nakae o palapala gagaina butukáona nakae go, idigo kadi, ‘Yauwe ida Yaubada iilovina! Tauna tayapalīye!

⁷ Tauyawana dōkana, tayapalīye be nakae ina togaga ana káeyana takamoitamōe unana ina nai ana tuta bogina ima. Nakae tonai vavina bogina ikatubayasi idi nai manuna! Tauna ina togaga ana káeyana takamoitamōe!

⁸ Ina katubayasiyana moe Yaubada bogina itagona bego vavinayana kwama poowouna nakae maavadaina ilosi.’ Kwamayana ana yagoina moe Yaubada ina kimasabayao idi sinapu dedevidi nakae.

⁹ Amo ikavava, ilatuwokoigu idigo kana, ‘Livala ame kugīni kam, “Avatauwa komi neta Yaubada iduduwemi Lamiyana ina nai aikanina manuna, e ami dedevina bei kobabane.”’ Tuwaina kana, ‘Ame livalayadi moe Yaubada ina livala mooitamoidi!’

¹⁰ Tuwo aneroseyana aena goi aegu avatugúyala be yaina asakululu go, ilatuwokoigu idigo kana, ‘Moe nakae geya! Yau goi ima go, Balomayana nakae tokabivalavala nukotodi isanayatoidi valayana sitalavaite. Tauna kom be yau vala tayamo ana totalavaitayao tavavasa.’

Yaubada ana kaleyayao idi vailai ( ) Osi poowouna ana tosowoya ikatubayasi yaviya manuna

¹¹ Amo ikavava, agite yábana ikatupáeva go, kunōve! itakínona be nakae ivayaviya.

¹² E matana adi kaigigita yeu sabeninimina nakae go, dabana goi lovina dabayogigina esaaesaina badabadaidi sikaaiyaka. Yoina sigini go, ana yagoina Tauyana anetava iyagoi.

¹³ Ana kwama maanawena go, ikaika goi sivakutui, tauna ikaika kaka. Yoina sivayou kadi, ‘Yaubada Ina Livala.’

¹⁴ Yábana ana tovayaviyayao madi kwama poowoudi be maavadaidi idi osi poowoudi sisowoya go, Tauyana sisabookuliye.

¹⁵ Go Tauyana tobuna goi sisi sooinina nakae iisowóduwo bego goi ivavetevetedi; aba vavetavetayana moe Yaubada Tokalika toina ina egamogamogu gagaina.

¹⁶ Go ana kwama maanawena goi be nakae dibuwatuna goi yoina sigini kadi, ‘ liliudi adi Tokalibúbuna be nakae tomoyamoya liliudi adi Tomoya.’

Woiwoi mana bodao sivailai

¹⁷ Amo ikavava, tayamo anerose agite níyala goi iitaoya, mánuwo madabokidi yábana osasaina goi siyovayova iduduwedi idigo kana, ‘Kodēli kōma kogūguna Yaubada ana káika gagaina goi

¹⁸ bego amo tauyadi wowodi kokanidi: Tolovina wowodi, tovayaviya adi tokalikumatanayao wowodi, koroto toogagaidi wowodi, osi madi tosowoyayao wowodi be nakae tomota liliudi wowodi, nakona taliigavidi o paakonidi, nakona youtagau o maa yoidi.’

¹⁹ Amo ikavava, woiwoiyana boi négwasa goi isinalaga be nakae poyapoya ana tolovinao madi tovayaviyayao agitedi bogina sitaligógana sima bei Tauyana osi poowouna goi iitulaga mana tovayaviyayao sivayaviyedi.

²⁰ Go Tauyana osi poowouna goi iitulaga itaoya, woiwoiyana be nakae polapolayana iyoisidi. Tokabivalavalayana boi aba kinana imadagidi, e aba kinanayadi goi tomota ikatubaudi. Amo tauyadi woiwoi ina katukatu nimadi o dabadi goi sikaupakiyedi nakae tokwalu woiwoi maisiyana yaina sisaakululu. Tuwo adi taiyuwokova iyoisidi ilavedi ma yawoidi sisou sina yeu sabeninimina poiseni mokauna taiyao sinaedi goi.

²¹ Kidi go woiwoiyana ina tovayaviyayao nava sikaaiyaka, tuwo osiyana ana tosowoya ina livala sisi nakae tobuna goi isowóduwo ikaumatedi. Tuwo manuwoyadi liliudi sima wowodi sikanidi, bogina gamodi.