Aba Vatowo 49 - Buki Kimaasabaina

Yakobo natunao ikaipakuyedi tetelina

¹ E natunao iduduwedi sima idigo kana, ‘Kōma kotunibisīgu bei alatuwokoimi kaga bei isowóduwo yaimi.

² Natugowo, Kōma yau tamami Yakobo kotaiyakekēgu. Yau tamami guna livala konōve.

³ Rubeni, Kom guna botomoya, guna togaga. Kom guna togagayana goi agimivenatunim; agitem kom guna togaga ana kaba kinana. Natugowo yaidi goi kom yoim gagaina be nakae kom totogaga.

⁴ Kom sákala gagaina nakae idaudau go, tomota geya itoboinedita sikabikunuim. Go boi monegu aiyuwoina kumasisiye. Moeko goi kugieomaemaegu. Tauna am gomanao geya kutobusavedita.

⁵ Simioni be Livai, Komi imi sinapu sivavasa. Boi imi sisi koyatakoidi imi kaipíyama guinuwa goyogoyoina manuna.

⁶ Boi imi egamogamogu goi koroto kokaumatedi be nakae mami uyáwana bulumakau kolauibesoidi. Tauna imi sinapu kotulutulu. Geya latuwogu bego asiuko; geya latuwogu bego akabivekoveko kidi taiyao.

⁷ Imi egamogamogu ivakaigaga be nakae geya imi nuwokapisimo; tauna imi egamogamoguyana pasina akatubolatemi. Komi alivisimi guna bodao yaidi; tubumiyao bei akausapesapedi guna bodao yaidi goi.

⁸ O Yuda, Semowo bei siyapaliyem. Im kaleyayao bei siwo go, kom bei kutogagasavedi. Semowo aedi bei sivatugúyala kom yaim.

⁹ Kom bonatuna nakae. Laiyoni ina sinapu ame nakae: Yoguyogu tayamo ikani ikavava, ikaluvila ina kebana goi imasisi. Koroto simatoita bego siwoini; tauna geya vatau tayaamo bei ima ilauim.

¹⁰ Kom mam lovina go, lovinayana bei ikaiyako vata am dala yaina. Koroto tayamo am dalayana goi bei ilovina ana kadókana Tokalibubunayana ima ikalibúbuna be nakae tomota liliudi sopana sikabikaone.

¹¹ Tauyana bei toesaesa, nakae ina buyalina keuwoina dedevina badabada isaki toina. Tauna itoboine oine buyalina goi ina bonatuna isiko, e keuwoina ikáika. Aiyuwoina ina oine gagaina, tauna itoboine oineyana goi ana kwama iníkina.

¹² Tauyana koroto gumaboina ame nakae: Oine bwaena ana nim ivakaigaga, tauna matana ivakayakaya. Aiyuwoina bulumakau nununa bwaena ana nim ivakaigaga, tauna salana sivapopowou.

¹³ Sebuloni, Kom négwasa kikina goi bei kwaaiyaka. Im kasa aolaoina dedevina. Im túwana ina asa Saidoni goi.

¹⁴ Isakara, Kom ase toogagaidi nakae. Aseyadi asa nauyayanaidi goi simasisi siwaiwasi.

¹⁵ Kom aba waiwasiyana bei kugite dedevina nakae kuuyaone. Tuwo bei kutagona paisewa moumouna kuguinuwa go, kom bei tomota idi .

¹⁶ Dani, Kom bei totakínona dala tamo tamo Isileli sinaena, nako todedevidi, nako toogoyoidi kutakinoidi.

¹⁷ Kom bei moteta nakae. Moteta ina sinapu ame nakae: Itamumu limou sinaena ana kadókana koroto ma ilokoina ima. Motetayana bei isowóduwo osi aena ikani, tauna korotoyana ikapusi isou. Kom motetayana nakae bei im kaleyayao kuvasobusobuyedi.’

¹⁸ E Yakobo ikawanoi idigo kana, ‘, im yava atuuyaosi!’

¹⁹ E tuwaina natunao ilatuwokoidi idigo kana, ‘Gadai, Tovaináwana bei siwo yaim bego sivaináwana. Ago tovainawanayadi bei sisiya unana kuvatapiyedi.

²⁰ Aseri, Kom im tánuwo bei iloboina. Tauna im dibayoya gagaidi bei kubabanedi. Avam kuvaipolu dedevina moe guyaguyauwo itoboinedi sikáika.

²¹ Napatali, Yoguyogu woiwoi idi sinapu ame nakae: Toinidi silovina; nako latuwodi sina, e moe sina. E kom nakae. Ago natumowo nakae idi sinapu dedevina.

²² Iyosepa, Kom ase woiwoi tayamo nakae doelu kikina. Nakae ase bonatuna nakae koya tagatagagina goi.

²³ Im kaleyayao gamodi sigoyo, tauna idi sau goi siginubasim nakae sivatapiyem.

²⁴ Go kom bei kutaoyakavata nakae nimam sitogaga Yaubada, Tauyana yau Yakobo guna Totogaga, pasina. Tauyana yau Isileli guna Tomatakavata nakae guna Gurewa

²⁵ nakae yau guna Yaubada. Tauyana bei ivaitem. Tauyana . Ina kaipakuyana ame nakae: Kúwana dedevina bei isou, ami bwae doelu goi ikaubobóbwala. Natumowo badabadaidi bei sibíbina. E nakae im yoguyoguyao sisusáila.

²⁶ Nakonakae Yaubada bei ikaipakuyem, e aipakuyana bei tubugu be tamagu adi kaipaku idedevinasavedi. Akawanoi Yaubada yaina bego ame aipakuyana ikaaiyaka yaim unana kom semowo kutobukukuyuidi.

²⁷ Beniyamina, Kom weiniya woiwoi sasasaidi nakae. Nobuyana goi im kaleyayao kukaumatedi nakae weiniya woiwoi yoguyogu sikaumatedi. Go lavilavi goi konadi kukaiguyauyedi semowo yaidi nakae woiwoiyadi yoguyogu iwoina sikaiguyauye sediyao yaidi.’

²⁸ E ame taudi yawou aiyuwo Isileli goi sisowóduwo. Ame nakae Yakobo natunao ikaipakuyedi. Boi kidi idi sinapu igitedi, e tauna nakae ikaipakuyedi.

Yakobo ina kámasa tetelina

²⁹ Yakobo ikaipakuyedi ikavava, idigo kana, ‘Natugowo, giyakainava bei akámasa ana tamagu be tubugowo yaidi. Tutayana akámasa ikavava, wowogu kokābi konāve tamagu be tubugowo taiyao kovaliwōge. Tauyadi adi valiwoga moe tukubu sinaena Eta tubuna Epironi ina poyapoya goi.

³⁰ Epironi ina poyapoyayana moe Kenani sinaena tayamo asa giyaina yoina Makipela. Makipelayana moe kikina. Boi nimatu tukubuyana be nakae poyapoyayana Eta tubuna Epironi yaina Eberamo igimonedi.

³¹ Amoko goi Eberamo ma monena Sera adi valiwoga be nakae Aisake ma monena Ribeka adi valiwoga sikaaiyaka. E tukubuyana goi boi Reya nakae avaliwoge.

³² Ego poyapoya be tukubu Eta tubunao goi Eberamo igimonedi. Tauna amoko goi kovaliwogēgu.’

³³ E Yakobo natunao ilatuwokoidi ikavava, imasisimna go, yawoina ikavava, e ina tamana be tubunao yaidi goi.