2 Tesalonáika 1 - Buki Kimaasabaina

Leta ana togínina be ana tokatuyaivayao

¹ Komi ana totugugunayao Tesalonáika goi, Komi Tamada Yaubada be ida Tomoya Yeisu taiyao bogina kospwagógana, e ame ami leta yau Paulo, Silovano be Timoti kaetune iwo yaimi.

² Tamada Yaubada be ida Tomoya Yeisu idi kanuwóiya be idi tuboina bei sivinimi.

Paulo kidi idi kauyagu be Yeisu ina kaluvilamna manuna

³ Semao, itoboinema tuta liliuna kakaauyagu Yaubada yaina goi komi manumi. Ima kauyaguyana itoboine unana imi numisa nava ibibíbina nakae imi sedao yaidi goi kovaaituwe.

⁴ Tauna Yaubada ana totugugunayao liliudi matadi goi kauyawana gagágasa manumi. Yaubada ana totugugunayaoyadi kalatuwokoidi komi gedageda be mou kobaabanedi go, nava komeesayágana be koonumisa.

⁵ Imi sinapuyadi kiyakiyaya tayamo bego Yaubada ina takínona moe kivaavasaina, tauna bei ivayokoimi kina tomotaimi. Moe pasina ame tuta mouyadi kobaabanedi.

⁶ Moitamo. Yaubada ina takínona moe kivaavasaina, tauna itoboine tauyadi siyogedeegedemi ikatumapudi, e nakae iyogedegededi.

⁷ Ago komi be kai ida mouyadi goi ida waiwasi bei ivinida tutayana ida Tomoya Yeisu yábana goi isowóduwo. Tauyana mana toogagaidi

⁸ yeu sabeninimina ikalinibisidi go, sisou simamaima. E ina sowoduwoyana goi avatauwa neta Yaubada geya siyagoiyeta be nakae ida Tomoya Yeisu Valena Dedevina geya sikabikaoneyeta, bei ikatumapudi.

⁹ Tomota amo tauyadi nakae Yaubada ina liuna bei sibabane. Liunayana moe sivailai vata. Nakae ida Tomoya matana goi be ina togaga ana goi itavileiyevataedi.

¹⁰ Moe bei isowóduwo tutayana Tauyana bei ima bego ina kimasabayao sitaimamine o tadigo kada, ‘Ina tonumisayao liliudi sikainaope.’ Moe komi nakae taiyao unana ima talavaita konumise.

¹¹ Imi yapaliyana pasina tuta liliuna komi manumi kakaawanoi ida Yaubada yaina bego tutayana idovatusimi, bei igitemi komi imi ketoiya itoboine nakae boi bogina iduduwemi ina bodao. Aiyuwoina kakawanoi bego ida Yaubada ina togaga goi ikitoogagemi bei komi imi sinapu dedevina nakae latuwomi be nakae itoboinemi imi guinuwa imi numisa pasina koguuinuwedi.

¹² Ima kawanoiyana nakae bego yawoimi goi ida Tomoya Yeisu ina togaga ana káeyana kovagiitakoe be nakae komi nakae yoimi ikilaagasidi. Moe nakae itoboine unana ida Yaubada be ida Tomoya Yeisu idi kanuwóiya yaida goi ikaaiyaka.