1 Korinta 13 - Buki Kimaasabaina

¹ Nakona itoboinegu tomota niyadi liliudi goi o niyadi goi abobóbwara go, neta matakoi ategu goi geya ikaiyaketa, e yau vínava nakae sikaubakobakoli o síula nakae siuwe besobeso.

² Nakona yau Yaubada ina tayamo. O nakona nuwonúwana nikuunikudi be nanamsa madabokidi ayagoidi. O nakona guna numisa gagaina, nakae itoboinegu koya alovinaedi bego sina masigava. Go neta matakoi ategu goi geya, e yau geya basabasaigumo.

³ O nakona konagu liliuudi akaigimonedi go, tookaidi avakanidi. O nakona wowogu atagone bego sigabu segowo adi dedevina manuna. Go neta matakoi ategu goi geya, e guna guinuwayadi geya keuwoidimo.

⁴ Tomatakoi araamaitaina, tauyana kubuunuwaina. Geya ivakiipikipi; geya igagágasa; geya inuuwatue;

⁵ geya ikaaipopóita; geya ikaugeogéona anetava manuna; mainao geya iegamoogamogu; píkwana geya inuwokaavatedi.

⁶ Goyo geya iuyaonedita, go sem livala moitamo iuyaone.

⁷ Tomatakoi vaita goi geya ikawoowoteya, ina numisa tomota yaidi geya iikalave, ina lotuta tomota adi dedevina manuna geya iikavava, be nakae tomota idi guinuwa pasidi nuwona geya itopatopa.

⁸ Matakoi ikaiyako vata go, Baloma Kimaasabaina ina kaiguyau nava bei sikavava. Nakae Yaubada ina livala ana kabivalavala bei itagau. bei isayata. Yaubada ana nanamsa ana kaiwóduwo bei itagau. Ame aiguyauyadi adi tuta bei sikavava.

⁹ Moitamo. Ame tuta nanamsa giyaina tayagoi be nakae Yaubada ana talavaita giyaina tauna takabivalevale.

¹⁰ Go tutayana ida Tomoya ikaluvilamna ima, Yaubada ina nuwonúwana madabokinakova bei isowoduwo dókana go, ame aiguyauyadi kaavavaidi bei sitagau.

¹¹ Tutayana yau gómana, abóbwara gómana nakae, anuwonúwana gómana nakae, nuwogu gómana nakae go, tutayana amalakoroto, e gómana sinapuna akalavedi.

¹² Moe nakae ame tuta saribu goi tagite tadogawugawuwuli. E niga go bei imavada nakae neta tomota matana matada goi tagitedoko. Ame tuta tayagoi giyaina. E niga go bei tayagoidoko nakae kina bogina iyagoidokoida.

¹³ E ame tuta sinapu aito sikaaiyaka: Numisa, lotuta, matakoi. Go ame sinapuyadi yaidi goi matakoi moe sinapu gagaina toina.