Titi 2 - Gourmanchéma Bible

¹ Ama fini wani, ŋan yaa bangi yaala n ŋua mi bangiŋanma.

² Ŋan yaa wangi a jakpela ke ban yaa kubi bi yula, ki yaa tie bi niba n jigindi yaaba, ki pia li yantiaŋanli, ki se ke li ŋani li*dandanli nni leni mi buama leni li juunli nni.

³ Ŋan go yaa wangi a pociana ke bi tagi n yaa tuugi leni mi gagidiŋanma, ban da tie tuotabigu danba, yaaka dañogaada. Ama li pundi ban yaa bangi yaala n ŋani,

⁴ ki tundi bi pomadiba ban yaa bua bi ciaba leni bi bila,

⁵ ki kubi bi yula, ki yaa pia yaa yantiali n ŋani, ki yaa tuuni bi diedi tuona bonŋanla, ki go yaa ŋanbidi bi niba po, ki miindi bi yula bi ciaba kani ke oba kuli n da sugidi U Tienu maama.

⁶ Ŋan go yaa tundi bi jawaaba mo ke ban yaa pia mi yama li bonla kuli nni.

⁷ Ŋan tua bipo li bontogidikaala a tuonŋama nni. Ŋan yaa bangi yaa bangima n ŋani ki go pundi.

⁸ Ŋan maadi yaa maama kuli n yaa ŋani, bi niba n kan fidi ki jaligi yaama, ke yibali n fiagi ki da baa wan baa fidi ki maadi tipo yaa mabiadima kuli.

⁹ Ŋan tundi i yonbi ke ban yaa fangi bi canbaanba li bonla kuli nni, ki go yaa mangidi bi pala, ki da nia leni ba,

¹⁰ ki da su liba. Ban doagidi ke bi tie nidugikaaba, ke ban teni bi niba n yaa jigindi U Tienu ti Candaano yaa bangima.

¹¹ U Tienu *ŋanbili yaala n cuani mi *tindima bi niba kuli po doagidi.

¹² Li bangi ti ke tin paadi leni U Tienu yiema leni ŋanduna bonbuakaala, ki yaa ye ŋanduna na niinni leni li yantiaŋanli, ki tiendi yaala n tiegi, ki fangi U Tienu,

¹³ ki go gu tin sugini yaala ke li pia li pamancianli yeni, lani n tie ti Tienu yua n tie Tienciamu leni ti Candaano Jesu Kilisiti yaa kpiagidi yaa doagidima.

¹⁴ O den puni o yuli ki kpe tipo ke wan da ki faabi ti leni mi biadima kuli, ki ŋuudi ki ŋanbi ti tin tua wani n die yaaba, yaaba n baa pia li yankuali a tuonŋama po.

¹⁵ Lani n tie ŋan baa maadi maama, ki tundi ba ki tigini ba, ki fu leni ba leni li bali. Ŋan da tuo oba kuli n fali a.