Sofoni 2 - Gourmanchéma Bible

¹ Taani mani ki paagi, Yinba yaa niba n ki gba i fe yeni.

² Tieni mani yeni, hali ki daa tua nani u faalu N figi ki yayadi yaa moafenma yeni. Tieni mani yeni hali ke Li Miali Diedo pabienli, Yaali n nani mi fantama yeni daa nandi yi, Hali ke o pali n baa fii yipo yaa daali yeni daa pundi.

³ Yinba, ki tinga yumiindanba kuli, Lingi mani Li Miali Diedo, Yinba yaaba n tuo ki baa ŋua o ñoabonbilikaana! Yaa cuoni mani leni mi *teginma, Yaa cuoni mani leni li yumiinli, wani U Tienu nintuali. Li fidi ke yi baa ciadi, Li Miali Diedo pabienli daali.

U Tienu fu leni yaa nibuoli n ye nintuali

⁴ Bi niba baa bodi Gasa dogu nni, Asikaloni yaaba baa bodi, Yibalinba baa deli ki ñani Asidodi yaaba bi dogu nni yensicocolu, Bi baa deli ki ñani Ekiloni yaaba moko bi dogu nni.

⁵ Fala n baa yi, yinba yaaba n tie Kafitodi yaaba, Ki ye mi ñincianma balinma. U Tienu jagi ki bili yipo yaa buudi n tie na ki yedi: «Yinba Kanana yaaba, Yaaba n ye Filisiti yaaba dogi nni, N baa bolini yi, Baa niyendo kan sieni.

⁶ Yi diema yaama n ye mi ñincianma balinma yeni baa tua fuali. Mi baa tua bi yankpaaba n baa yaa kpaa bi yandi naani, Mi baa tua ban baa yaa pua a yanlola naani i yankuli po.

⁷ Juda niba yaaba n ciadi baa diedi laa kaanu, Bi baa yaa kpa bi yandi lankani. Ku juogu yaa yen baa mo, Bi baa n dua Asikaloni dogu yaa diena nni, Kelima Li Miali Diedo bi Tienu baa ŋanbi bipo, Ki teni bi niba yaaba n den ye ti yonbidi yeni n goa ki kpeni.»

U Tienu fu leni puoli yaa nibuoli

⁸ Li Miali Diedo yedi: «N gbadi Moabi diema yaaba n sugidi n niba yaa sugidi, Leni Amoni buolu yaaba mo n maadi yaa japaamaama, Ki yuali n niba. Bi fie n niba diema ki pugini bi yaa diema.

⁹ Li tie lani yaa po ke mini, Li Miali Diedo U Paaciamu Kuli Daano, Isalele yaaba Tienu poli ki yedi: ‹N ye ki fo, Moabi yaaba leni Amoni buolu yaaba baa bodi Nani Sodoma leni *Gomola yaaba n bodi maama yeni. Ti konkondi baa fii ki luoni bi diema nni, Likani baa tua tinyaama, Likani baa tua paboanli kaanu hali yaa yogunu kuli po. N niba yaaba n ciadi baa cua ki fagi bi diema piama, Ki fie bi diema mo.› »

¹⁰ Laa bonla baa baa ba kelima bi japaadi po, Leni ban den fiagi Li Miali Diedo, U Paaciamu Kuli Daano niba maama po.

¹¹ Li Miali Diedo baa cie bi jigi, Kelima o baa bolini bi nisaaliba *buli kuli. Lanwani baa yaa nibuoli yaa niba n ye hali foagima Baa gbaani ki kpiagi o bi diema nni.

U Tienu fu leni Etiopi yaaba leni Asili yaaba

¹² Li Miali Diedo yedi: «Yinba, Etiopi yaaba, N baa teni yi yibalinba n kpa yi leni mu jugisiemu.»

¹³ O baa fii ki sedi nijienu yaaba po, Ki bolini Asili diema yaaba, Ki teni bi dociamu Ninife n tua paboanli kaanu, Leni fanpienma, naankani n ki pia ñima.

¹⁴ Likani baa tua denyandi leni ti fuayandi buoli kuli n baa yaa ye naani. A juuna leni a guda n baa yaa ye likani diejendi nni, Ki cigindi ki mua a diebona kani. I nuani baa yaa jagi a diebona kani ki mua, U dogu kukuli li baa tie diegbendi bebe. Bi ŋabi ban den maa a diena leni sedili daadi yaadi yeni.

¹⁵ Lani n tie yaala n baa baa laa dogu yaaba, Bani yaaba n den pia ti japaadi ki jigini bi fidiceli, Ki tama ke liba kuli kan baa ba, Ke baa pia kuli bilie. Diidi likani n tua paboanli kaanu maama! Likani tua ti yandi wuonkaanu! Yaaba n tagi likani kuli fuoni ki fegini bi yula.