Sakari 9 - Gourmanchéma Bible

¹ Li Miali Diedo maama n tie na: O jagi ke o baa waani Hadilaki diema yaaba fala, O baa waani Damasa yaaba moko fala. Kelima o naa die Isalele buoli yaaba bebe ka, O die bi nisaaliba kuli.

² O maadi leni Hamati dogu yu n ki kuu Damasa yeni yaaba moko. O maadi leni Tili leni Sidoni yaaba, Bani yaaba n pia mi yanfuoma boncianla yeni.

³ Tili yaaba maa u kaanpaalu, Ki dogini ŋanjilifa leni wula nani u sanu nni tama yeni.

⁴ Ama o Diedo baa fie ban pia yaala kuli, O baa lu bi buciami mi ñincianma nni, Ki teni mi fantama n je u dogu yeni.

⁵ Asikaloni dogu yaaba baa le lani, Gasa yaaba moko baa digibi boncianla, Ekiloni yaaba moko baa soani yene, Kelima ban bi jigini yaala cie bi jigi. Gasa dogu baa luo bado, Asikaloni dogu mo baa luo niba.

⁶ I nibuoli boncianla baa taani ki kaali ki yaa ye Asidodi dogu nni. Li Miali Diedo yedi: «N baa jiini Filisiti yaaba japaadi.

⁷ Ama n baa teni ban da go ŋmani ti nandi leni mi soama, Leni min kuani n niba yaa jiema. Bi siiga yaaba n ciadi baa tie n niba, Nani Juda buoli siiga buoyendu yeni. Ekiloni yaaba baa tua n niba nani Jebusa yaaba yeni.

⁸ N baa yaa guu n diema, Ki koani ki ga ma yaa toagola n fii mipo kani. Oba kuli kan go waani n niba fala, Kelima moala n maani n nuni bipo.»

Yaa bado n baa cuani mi yanduanma

⁹ Mangi mani yi pala, yinba Siyono dogu yaaba! Kpaani mani i pamandankpaani, yinba Jelusalema yaaba! Diidi mani, yi bado kpendi yi kani! O tiegi, ki paadi li bonla kuli mo! O dingi, ki jagi o ŋunbo! O jagi ŋunbiga, ŋunñua biga!

¹⁰ O baa bolini ti toateliti Isalele buolu yaaba siiga, Ki bolini i taami mo bani Jelusalema yaaba siiga. O baa kua bi dabana. O baa teni mi yanduanma n yaa ye i nilanbuoli siiga. O baa yaa die, ki cili ñincianma kani ki ban tuoni hali ñincianma, Ki cili Yufilata kpenu ki ban tuoni hali u tinbianu.

Yaaba n ye ti yonbidi faabima

¹¹ Li Miali Diedo yedi: «N ñani yi yonbi yaaba n ye yaa kpaadidieli n tie nani li cakuonli yeni. N faabi ba kelima yaa *ŋantaado n ye mini leni yinba siiga, A pada soama n doagidi ke yaa ŋantaado n ye moamoani yeni.

¹² Yinba yaa kpaada n ye leni mi suginma, Lebidi ki kuni mani yi dogu po, Ban goa ki maa yu yaa bilini yeni. Dinla, n yedi yi, Ke n baa guani yipo hali taalima lie a sela, Yin laa yaa fala kuli po.

¹³ N baa taa Juda buolu yaaba, Ban tua nani o toatielo dabanli yeni, Isalele buolu yaaba mo n tua nani i dabanpiemi yeni. N baa taa Siyono yaaba ban tua nani o jakoando jugisiega, Ki koani leni Gileka yaaba.»

¹⁴ Li Miali Diedo baa doagidi o niba yula po, O dabanpiemu baa gedi nani mi tañigima yeni. O Diedo, Li Miali Diedo, baa piebi li naatuntunli, O baa cua leni ganu po tafaaciandi yene.

¹⁵ Li Miali Diedo, U Paaciamu Kuli Daano baa kubi o niba, O baa ŋa o tatana n bolini bi yibalinba, Ki teni bi soama n puubi nani duven yeni, Yaaka nani yaa soama n gbie bi kopadicianba N yen kubi yaa tadimu ki miini li *padibinbinli ñoakuni po yeni.

¹⁶ Laa yogunu, Li Miali Diedo baa faabi ba Nani o yankpaalo n baa faabi o yankulu maama. Bi baa ñuliti bi diema nni, Nani yaa tana n pia mayuli ki yen taabi mu badifogilimu po yeni.

¹⁷ Bi diema baa yaa mani ki go ŋani mo. Likani *ŋalikama leni o duvenpaano baa teni Bi jawaaba leni bi jafanba n yaa fiidi leni u gbanmanu.