Sakari 7 - Gourmanchéma Bible

¹ O bado Daliyusa bali binnaali binli, Li Miali Diedo den maadi leni nni. Li den tie ciyia danaali daali, lani n tie Kisilefi ŋmaalo.

² Betela yaaba den soani Saletiseli leni Legemi-Meleki leni nitoaba ke ban gedi Li Miali Diedo diegu nni ki ban jaandi ki mia Li Miali Diedo sela

³ ki go buali bi kopadicianba leni bi sawalipuaba yaa buali n tie na: «Naani cimuu ŋmaalo yaa ñani, ti go yen baa mua ki go loli bu ñoabu nani tin den tiendi maama hali yogu?»

⁴ Li Miali Diedo, U Paaciamu Kuli Daano den maadi leni nni ki yedi

⁵ ke min waani mi diema niba kuli leni bi kopadicianba yaa maama n tie na: «Yi den luo bu ñoabu ki go buudi cimuu leni cilele ŋmaali nni hali bina piilele. Ama naani, moamoani, yi den luo laa ñoalolima mini yaa po yo?

⁶ Naani yin den di ki go ñu yeni, laa den tie yi yula po ka?»

⁷ Naani mii den kpa soani n sawalipuaba hali yogu ke bi waani laa maama ka? Lani n tie hali yaa yogunu ke Jelusalema dogu leni u tinkundogi yaaba da kaa leni mi yanduanma, ke niganu po diema leni Sefela mo da pia bi niba.

U Tienu go tiadi o niba ke ban yaa ŋua mi teginma

⁸ Li Miali Diedo den maadi leni nni ki yedi yaa maama n tie na:

⁹ «Mini Li Miali Diedo, U Paaciamu Kuli Daano den yedi: ‹Yaa ja mani ti buudi leni mi *teginma, ki go yaa pia mani yiyaba po mi ŋanma leni mi niñingbadima.

¹⁰ Yin da mabindi a kpepuona, a kpienbila, bi canba leni a tadima. Yin da kpaagi yiyaba po yaala n bia.›

¹¹ Ama bi niba den yie kaa cengi. Bi buli bi nunmu, ki biini bi tuba kaa bua ki gbadi.

¹² Bi den juagi bi pala nani diama tanli yeni. Baa den cengi mini Li Miali Diedo, U Paaciamu Kuli Daano *bali maama leni min den kpa soani n sawalipuaba ke bi maadi n maama yaama leni n Fuoma. Lane n pali den fii boncianla

¹³ ke n den yedi: ‹Min den yedi ba ke ban tuo ki yaa ŋua nni, ke bi yie kaa cengi nni yeni, n den yie ke n kan guani bi miabu, ban den yi nni ke min todi ba yaa yogunu.

¹⁴ N den teni ke bi yadi ba ban kaa den bani yaa nilanbuoli siiga. Ban den gedi ki ŋa mi diema, mi den tua diegbena, nilo n kaa go den tagi naani. Laa diemanma den tua fanpienma ke nilo ki go ye mi niinni.› »