Sakari 5 - Gourmanchéma Bible

¹ N didi go den laa li bonlekaala nni li tigbabikaali ke li ye tanpoli ki yugi.

² Maleki den buali nni: «A nua be?» N den goa ki yedi: «N nua tigbabikaali ke li yugi. Li foagimu tie nukpanduna piilie, li pianu mo nukpanduna piiga.»

³ Lani, o den yedi nni: «Yaa solindi n baa baa mi diema n diani lipo. U kaliyendu po, li diani ki yedi ke bi baa deli ki ñani a sugida kuli mi diema nni. U kalilielu po mo, li diani ki yedi ke yaaba n pua mi faama ki polini moko bi baa soani ba yene.

⁴ Li Miali Diedo, U Paaciamu Kuli Daano yedi: ‹N yadi ti solindi yeni ke tin kua conconli kuli diegu nni leni yua n taagi n yeli ki pua mi faama ki polini kuli yaa diegu nni. N yadi ti ke tin kua lienni ki yaa ye, ki bolini ki taani a yoaga leni a tana kuli.› »

Li bonlekaleleedila: o pua ke o ye ku baabuogu nni

⁵ Maleki yua n den maadi leni nni yeni den cua ki yedi nni: «Yaadi ki diidi yaala n ban ña nepo na.»

⁶ N den buali o: «Lani mo tie be?» O den goa ki yedi nni ke li tie mi diema yaaba kuli *tuonbiadi n ye yaa baabuogu nni.

⁷ Yaa bonbiigu n den ŋuagi ku baabuogu, ki tie noabindi, den yugidi. N den laa pua ke o kaa ku baabuogu yeni niinni.

⁸ Maleki den yedi nni ke o pua yeni n tie mi biadima. O go den tudi ki kuani o ku baabuogu nni ki ŋoagini leni ku bonbiigu yeni.

⁹ Li yaa puoli, n den yaadi ki diidi ki laa puoba lie yaaba n ye tanpoli ki yugi ke u faalu den ŋua ki tudi ba. Bi fiabi den tie nani goliya yaa fiabi yeni. Bi den cua ki taa ku baabuogu yeni ki yugi leni gu.

¹⁰ N den buali Maleki yeni ban caani gu naani.

¹¹ O den goa ki yedi nni: «Bi caani gu Babilona diema po yo ki baa n maa kupo li dieli. Bi yaa maa ki gbeni li, bi baa sieni gu laanni.»