Sakari 3 - Gourmanchéma Bible

¹ Li Miali Diedo den teni ke n laa bi kopadicianba bado Josue, ke o se Li Miali Diedo maleki nintuali. Sutaani den se Josue jienu po ki bua ki kuli o.

² Maleki yeni den yedi Sutaani: «Li Miali Diedo n yie apo! U Tienu, wani yua n gandi Jelusalema yeni n yie apo! Naani Josue ki tie nani ban kuudi ki ñani yaa mudatali mi fantama nni yeni ka?»

³ Josue den laa tiajoaginde ki se Maleki nintuali.

⁴ Maleki yeni den yedi o yegininlieba ke ban landi wani Josue tiajoagindi yeni. Li yaa puoli, o den yedi Josue: «Diidi, n ñani apo a tagili, ki baa lani a ti jaantiadi.»

⁵ O go den yedi: «Fini mani o yuli leni yaa finfinjuadi n ŋani.» Bi den fini o yuli leni yaa finfinjuadi n ŋani, ki go yieni o ti tiayiekaadi. Li Miali Diedo Maleki den se likani.

⁶ Maleki yeni den yedi Josue ke

⁷ Li Miali Diedo, U Paaciamu Kuli Daano niani yaa ñoanianu n tie na ki yedi: «A yaa tuo ki cuoni n sani nni, ki kubi n *balimaama, n baa piani fine n dieli leni li luoli. N baa pa ŋa u sanu ŋan nagini n kani nani yaa malekinba n ye n nintuali na.

⁸ Lanwani, Josue, fini bi kopadicianba bado, ŋan cengi, fini leni yaa kopadicianba n yegi leni a, yinba yaaba n tie yaa *faabima n kpendi maalima. N baa teni n naacemo, yua n yi li Benkpeli yeni n cua.

⁹ N bili Josue nintuali li tanli, yaali n pia nuni lele. N baa diani lipo dianu ki ñani dayenli dayenli mi naa diema yaa tuonbiadi. Li Miali Diedo, U Paaciamu Kuli Daano n yedi.

¹⁰ Laa daali yaa pundi, yi siiga yua kuli baa yini o lieba yi duven tiidi tinga leni yi kankanŋuke tinga, ban mangi bi pala mi yanduanma po.»