Sakari 14 - Gourmanchéma Bible

¹ Li Miali Diedo pabienli daali nagini. Yinba Jelusalema yaaba, yi yibalinba baa boagidi yi piama yi nunbu nni.

² Li Miali Diedo baa taani i nilanbuoli, Ki teni ban baa Jelusalema. Bi baa fie u dogu, Ki fagi yaala n ye a diena nni kuli. Bi baa ñii yi puoba leni u paalu. Bi baa cuo u dogu niba boagidima ki gedini ti yonbidi. Ama yaa niba n sieni baa yaa ka u dogu nni.

³ Li yaa puoli, Li Miali Diedo baa fii i nilanbuoli yeni po, Ki pua ki paadi ba, Nani wan den kpa tieni maama mi janjanma leni bu toabu daali yeni.

⁴ Laa yogunu, o baa sedi *Olifie Tiidi juali po, Ki kuu Jelusalema dogu puoli. Li juali yeni baa pudi ki yagidi, Ki tiegi puoli leni nintuali, Ki ŋa joaloanciangu siiga nni. Line bonyagili baa yaa ye ki goa puoli, line mo nintuali. Bonyagiyenli baa sani ki foagidi ki teli nijienu po, Line mo niganu po.

⁵ Yi baa tagini ku joaloangu yaagu n ye a juana siiga yeni, Ki sani ki cia, Kelima ku joaloangu yeni baa tandi Ki pundi hali Atisali. Yi baa sani nani yi yaajanba n den sani maama, Juda bado, Osiasi yogunu, Mi tindigibima n den tieni yeni. Lanwani, Li Miali Diedo, n Tienu Baa yegi leni o malekinba ki cua.

⁶ Laa daali, Yenma kan yaa ye. Ti wadi baa kpandi ki tua nani a tatana yeni.

⁷ Laa yogunu baa ye uba yo, Li Miali Diedo bebe n bani u. Ku ñiagu leni u yensiinu kan yaa pia paadima, Kelima baa ku yenjuogu, li baa yaa yieni.

⁸ Laa daali, Li ñinbunli baa pudi Jelusalema, Mi ñima yeni boagidima baa yaa puubi Ki ban kua yaa kpenu n ye puoli, Yaa boagidima n sieni mo, yaa ñincianma n ye nintuali. Li baa yaa tie yeni ku siagu leni li fali kuli.

⁹ Laa daali, Li Miali Diedo baa yaa tie ŋanduna kuli bado, Bi niba kuli baa yaa kpiagidi wani bebe, Bikuli baa yaa taagi wani bebe yaa yele.

¹⁰ Mi diema kuli baa tua nani Alaba tialu yeni. Ki cili nijienu po dogu Geba, Ki ban pundi hali ganu po dogu, Limoni. Jelusalema dogu baa yaa ye u kaanu, Ki ye naani n kpedi. U baa tandi, ki cili bani Benjamina buolu yaaba buliñoabu kani, Ki ban tuoni hali bu buliñoakpelibu, Ki bonlogidiga buliñoabu kani. U go baa tandi, ki cili hali Hananeeli doguuda dieli kani, Ki ban tuoni hali o bado duven bonluonkaala datuodikaanu kani.

¹¹ Bi niba baa kaa u dogu nni, Ke bolinma kuli ki go ŋua u. Jelusalema dogu baa ye leni mi yanduanma.

¹² Li Miali Diedo n baa teni yaa bonbiadila n baa yaa nilanbuoli n baa fii ki tieni Jelusalema yaaba bu toabu tie line: Bi gbanandi baa bedi, Ke bi da fo. Bi nuni baa bedi bi nunbuodi nni, Bi landi mo n bedi bi ñoana nni.

¹³ Laa daali, Li Miali Diedo baa teni ti jawaanciandi n cuo ba. Bi baa jili ki cuo biyaba bi ŋmiali nni, Yua kuli baa koani leni o lielo.

¹⁴ Juda yaaba baa koani ki gaa Jelusalema dogu, Bi baa fie yaa nilanbuoli n lindi ba piama kuli. Bi baa wodi wula, ŋanjilifa leni ti tiayiekaadi hali boncianla.

¹⁵ Yaa bonbiadila n baa bi niba yeni baa cuo i taami, I *buomi, ti yuoyuodi leni i ŋunbi. Yaa yandi n ye i nilanbuoli yeni toanaga nni Kuli baa cuo la.

¹⁶ Li baa baa yaa niba n baa ciadi I nilanbuoli yi n den cua ki baa Jelusalema yeni siiga. Laa niba baa yaa kpendi binli kuli laa dogu nni, Ki kpiagidi Li Miali Diedo, U Paaciamu Kuli Daano, Ki go jaani a koasuga *jaanma.

¹⁷ Lanwani li yaa tie ke ki tinga nilanbuoli siiga, nilanbuoluba yie, Kaa caa Jelusalema ki ban kpiagidi Li Miali Diedo, U Paaciamu Kuli Daano, Taaga kan mii laa niba diema nni.

¹⁸ Ejipiti yaaba yaa yie, Kaa gedi Jelusalema, Ki ban jaani a koasuga jaanma, Li Miali Diedo n baa soani Yaa bonbiadila yaa nilanbuoli n yie yeni siiga Baa cuo bani, Ejipiti yaaba moko.

¹⁹ Lani n tie yaa bonbiadila n baa cuo Ejipiti yaaba leni yaa nilanbuoli n baa yie ke bi kan gedi laa jaanma.

²⁰ Laa daali, bi baa diani yaa coolonmu n juani i taami tuli nni po: “Bi gagidi la Li Miali Diedo po.” Li Miali Diedo diegu boba baa gagidi ki yaa ŋani, Nani yaa tadimu n se li *padibinbinli kani, Ke bi yen tiendi lienni mi soama ki miini yeni.

²¹ Yaa boba n ye Jelusalema leni Juda kuli, Bi baa gagidi ŋa Li Miali Diedo, U Paaciamu Kuli Daano po. Yaaba n baa yaa kpendi ki padi a pada, Baa yaa taani laa boba ki ŋaandi ti nandi. Laa daali yaa pundi, Kpendo kuli kan yaa ye Li Miali Diedo, U Paaciamu Kuli Daano diegu nni.