Sakari 13 - Gourmanchéma Bible

¹ Li Miali Diedo, U Paaciamu Kuli Daano yedi: «Laa daali, Li ñinbunli baa pudi, Ki yaa ŋuudi ki ñandi Dafidi puoliŋuani Leni Jelusalema yaaba *tuonbiadi leni bi joagindi.

U Tienu baa bolini i buli leni bi sawalipua-faadanba

² Laa daali, N baa bolini i *buli mi diema nni, Ke oba kuli kan go tiadi ba bi yela. N baa bolini yaaba n pua mi faama Ke bi tie sawalipuaba, leni bi yantiajoagindi.

³ Li yaa tie ke nilo go pua sawali, O baamado leni o naamado baa yedi o: ‹Li pundi ŋan kpe, kelima a maadi ki pua mi faama, Ki nan yedi ke Li Miali Diedo n soani a.› Lanwani o baa leni o naa, bani yaaba n mali o yeni baa muu ki kpa o, Wan pua mi sawalifaama yaa yogunu.

⁴ Laa daali, I fe baa cuo yaaba n pua sawali ke bi kan go pua. Bi kan go togidi bi bonlekaala mo. Bi kan go laa bi sawalipuaba liada ya n tie gbandi, Ki pia ti kobidi yeni, Ki yaa boandi bi niba.

⁵ Bi siiga, yua kuli baa yedi: ‹Mii tie sawalipualo ka, N tie kpakpaale, Ki ko bu kpaabu hali n bonwaama nni.›

⁶ Ama, bi baa buali o: ‹Be yaa nala n nan ye a benli po yeni?› O baa goa ki yedi: ‹Bi den pua nni n danlinba dene.› »

U Tienu niba baa goa ki tuo o

⁷ Li Miali Diedo, U Paaciamu Kuli Daano yedi: «Ki jugisiega, fii ki baa o yankpaalo, Min den taa yua ke o tie n todika yeni. Ŋan kpa o, Lani i pe baa yadi i kaani kuli, Min baa ki cuo a bonbila.»

⁸ O go den yedi: «N baa boagidi n niba caga taa, ki bolini caga lie. Cagiyenli bebe n baa sieni.

⁹ N baa ŋaani bani yaaba n sieni ki fo yeni, Nani ban yen tieni ŋanjilifa leni wula mi fantama nni maama Ki ñani ti joagindi yeni. Bi baa yaa jaandi ki miadi nni, N baa yaa guandi bipo bi miabu. N baa yedi: ‹Bine n tie n niba.› Bimo n yedi: ‹Li Miali Diedo tie ti Tienu.› »