Sakari 11 - Gourmanchéma Bible

¹ Libani yaaba, luodi mani yi buliñoana, Ke mi fantama n baa ki je yi sedili tiidi.

² Yinba sipilesi tiidi, yaa mua mani! Kelima sedili tiidi ba. Laa tiŋandi bodi. Yinba seni tiidi, yiin ye Basana, mua mani! Kelima ban den wuondi yaa fuali nni Judana kpenu balinma yeni bodi.

³ Bi gobidikaaba buudi, Kelima bi kpiagidi gbeni. I yangbanli duni, Kelima yaa fuali n den baali Judana kpenu Ke bi wuonkaani ye lienni yeni bodi.

Bi yankpaaliediba

⁴ Li Miali Diedo, n Tienu den yedi nni: «Yaa kpaa ban caani yaa pe u yankodikaanu po.

⁵ Yaaba n daa ba yen kodi ba kaa nua kuli tagili. Yaaba n kuadi ba mo tua ke ban tuondi Li Miali Diedo Kelima bi baa mi piama. Baa bi yankpaacele siiga, Oba ki gba bipo niñima.

⁶ N kan go gbadi niñima ki tinga niba po, N baa teni bi ŋmiali nni, yua kuli n soani o lielo wan fidi maama. N baa ŋa bi badiba moko n soani ban fidi maama. Bi badiba yeni baa bolini ki tinga niba, N mo kan faabi ba bi nuu nni. Li Miali Diedo n yedi yeni.»

⁷ Lanwani n den kpaa ban den caani yaa pe u yankodikaanu po. N den baa yankpaagbiami lie. U gbayendu den yi “Danligu,” u gbalielu mo “Taanyenma.” N den kpaa i pe yeni.

⁸ Ŋmayendo nni, n den cabi i pe yeni yankpaataadiba. Mii den fidi ki juuni leni ba, bani mo den miadi nni.

⁹ Lanwani n den yedi i pe yeni: «N kan go kpaa yi. Yua n baa kpe wan kpe. Yua n baa bodi, wan bodi. Yaa pe n sieni mo yaa fidi, ban ŋmani biyaba.»

¹⁰ N den taa n yankpaagbiamu yu n den yi “Danligu” yeni, ki kua, ki biidi U Tienu n den kuani yaa *ŋantaado leni bi niba kuli.

¹¹ O ŋantaado yeni den biidi lanyogu, lanyogu. A yankpenda, yaaba n den kpaagi nni den bandi ke n bontienkaala kuli den tie Li Miali Diedo n yedi yaale.

¹² N den yedi ba: «Yi yaa sua ke li dagidi, yin pa nni n panpaani. Yi yaa sua ke laa dagidi yin pa nni n ci mo, yin cedi. Lanwani bi den coadi kujapiena piitaa ki teni nni.»

¹³ Li Miali Diedo den yedi nni: «Bi sua ke mii cie laa dunga. Taa laa ligiciami ki ban teni o maano.» Lanwani n den taa i ligi yeni ki gedi ki ban teni o maano.

¹⁴ Li yaa puoli, n den kua n yankpaagbiamu yu n den yi “Taanyenma” yeni, ki biidi Juda yaaba leni Isalele yaaba taanyenma.

¹⁵ Li Miali Diedo go den yedi nni: «Taa ku yankpaayuogu yaa tiadi,

¹⁶ kelima n baa cuani mi diema po yaa yankpaalo n kan yagi o yama yaa pe n baa bodi po. O kan gedi ki ban lingi yaa pebiga n yaadi. O kan bu yaa pia n poagili. O kan ŋmandi nni yaa pe n pia laafia, ban guo. Ama o baa yaa ŋmani yaa pe n pia mi kpama, ki ŋmani ki ban taani leni a taawuoga kuli.»

¹⁷ Fala n baa ku yankpaayuogu, Yaagu n ŋa i pe. Bu toabu n bolini o nuu paalu, Leni o nuni gbanmanu, Ke o nuu n faani, O jiennunbu mo n juani!