Sakari 10 - Gourmanchéma Bible

¹ A sakuana yaa pundi, Yin mia mani Li Miali Diedo ke ki taaga n mii. O baa teni kan yini Ki mii hali boncianla. Yua kuli kuani baa goa ki boandi.

² Diidi mani i *buli n guandi yi yaala kuli tie faama, A baabuula n doagidi yaala kuli tie faama, Yaaba n bundi ti dangidi maadi mafanma, Ki baagidi yi fanma fanma. Lani n cedi ke bi niba puagi ki lindi Ki laadi fala nani yaa yankulu n ki pia kpaalo yeni.

³ Li Miali Diedo yedi: «N pali beni leni bi nilanba yaaba n gobidi n niba, Ke n baa waani ba fala. Mini Li Miali Diedo, U Paaciamu Kuli Daano n yedi yeni. N baa taa n niba, Juda yaaba, ki kubi ba. Bi baa tua nani min jagi yaa taamo leni ti kpiagidi bu toabu po yeni.

⁴ Juda yaaba siiga baa ña li tanpuuli tanjigi Leni li gbandieli kpaali, Leni bu toabu dabanli. Bi yudanba buoli buoli baa ña bi siiga ki taani,

⁵ Nani a jakoanda yeni, Ki ŋma nani i sani nni moamoadi, yaaba n koani leni ba. Bi baa koani yeni, Kelima mini Li Miali Diedo ye leni ba. I fe baa cuo bi yibalinba yaaba n jagi i taami.

⁶ N baa pa Juda yaaba u paalu, Ki faabi bani Isalele yaaba. N baa gbadi bipo mi niñima, Ki lebidi ki guani ba bi deni. Bi baa yaa tie npo nani mii den kpa yie ba baa yenma yeni, Kelima n tie Li Miali Diedo, bi Tienu. N baa guani bi miabu.

⁷ Bani Isalele buolu yaaba baa yaa tie nani a jakoanda yeni, Bi pala baa yaa mani nani yaaba n ñuni mi daama yeni. Bi puoliŋuani baa le lani, Li Miali Diedo n baa pa ba yaa pamancianli yeni.

⁸ N baa teni ban kpaani ki taani n niba. Min faabi ba, Ki teni ban yabidi nani ban den kpa yabidi maama.

⁹ N den yadi ba i nilanbuoli nni, Ama bi den tiani npo, baa ke bi den ye foagima. Bani leni bi bila kuli baa ciadi, Ki yegi ki lebidi ki kpeni.

¹⁰ N baa ñani ba Ejipiti leni Asili diema, Ki goa ki kpenni n ba bi deni. N baa kaani ba Galaadi leni Libani diema nni, Ama baa yeni, mi fanma kan dagidi ba.

¹¹ Bi baa duodi li paboanli ñincianma, Bi baa pua ki duani mi ñincianma ñingola, U kpenu Nili baa ñuudi. Asili yaaba japaadi baa jiidi, Li bali baa bodi Ejipiti nni mo.

¹² N baa pa n niba u fidu, Bi baa yaa kpiagidi nni, Ki tuodi ki tiendi min yedi yaala. Li Miali Diedo n yedi lani.»