Ruti 4 - Gourmanchéma Bible

¹ Boasa den gedi ki ban kali u dogu buliñoabu kani, mi maama n kadi naani. Naomi calo Elimeleki kpiilo, Boasa n den maadi yua yaa maama, den tagini ki baa pendi likani. Boasa den yedi o: «Fini ŋmeŋme, cua ki kali ne.» O den cua ki kali.

² Boasa den yini u dogu nikpela siiga nikpela piiga ki yedi ba: «Kali mani ne.» Bi den kali.

³ O den yedi Elimeleki kpiilo yeni: «Naomi ñani Moabi diema ki goa ki kpeni. O kuadi ti kpiilo Elimeleki kuanu.

⁴ N sua ke li pundi min waani a, ki yedi a ŋan daa u u dogu yaaba leni ti nikpela nintuali. A yaa bua ki daa u, ŋan daa. A yaa bua mo ŋan waani nni min bandi, kelima oba kuli naa pia sanu ki cie ŋa laa maama po. A yaama mo yaa ye lienni, mini n di ŋua.» O ja yeni den goa ki yedi: «N baa daa u.»

⁵ Lanwani Boasa den yedi: «A yaa daa Naomi kani u kuanu yaa daali, a go baa taa Luta yua tie Moabi yua, ke o calo yua n kpe yeni diegu n da bodi.»

⁶ O ja yeni den yedi: «Li yaa tie yeni wani, n kan fidi ki daa, kelima n jie n piama po. N puni a u sanu ŋan daa, kelima mini wani kan fidi.»

^7-8 Wan den maadi yaa yogunu ki yedi Boasa n da u kuanu o den pidi o cacaagu ki teni wani Boasa. Li den sua ke Isalele nni, niba yaa daa bonla bi ki lebidi, yendo yen pidi o cacaagu ki teni o lielo lan doagidi ke ki dunga cuo. Li den tie siedi ke mi maama kadi.

⁹ Lanwani Boasa den yedi a nikpela leni u dogu yaaba kuli: «Yi tie n siedinba dinla ke n daa Naomi kani Elimeleki leni Kilijoni leni Makiloni n den die yaala kuli.

¹⁰ Ki go taa Makiloni kpepuoli Luta, yua n tie Moabi yua, ki baa baa o calo yua n kpe po u buolu. Yeni o kpiemo faali baa sedi o buolu nni, o yeli mo kan bodi o kpiiba siiga leni o dogu nni. Yi tie n siedinba dinla.»

¹¹ A nikpela leni yaaba n den ye u dogu bilinciamu buliñoabu kani kuli den yedi: «Ti tie a siedinba, Li Miali Diedo n teni ke yaa pua n baa kua a diegu nni yeni n yaa tie nani Lasela leni Lea yeni, bani yaa poliediba n mali Isalele yaaba buolu yeni. A paalu n doagidi Yufilata buolu yaaba siiga, a yeli n kpedi Betelema nni.

¹² Li Miali Diedo n teni o pua yeni n maa apo a bila boncianla, ke a diegu n nandi leni Peletisa yaagu, Tamala n den mali yua Juda po.»

¹³ Lanwani Boasa den taa Luta ke o tua o pua. Wan den kua o kani, Li Miali Diedo den seligi Luta ke o taa ku tugu ki mali bonjaga.

¹⁴ Bi puoba den yedi Naomi: «Li Miali Diedo n baa ti kpiagidi, wani yua teni ke ŋaa luo buolu dinla. Laa biga yeli baa kpedi Isalele yaaba siiga.

¹⁵ O baa goa ki kaani a jigi, ki kubi ŋa a nikpedi nni, kelima a biyuaga n mali o. Wani a biyuaga yeni, o cie apo baa bonjala lele.»

¹⁶ Naomi den gaa ki biga yeni ki ŋmabi ga, ki tua ki biyualo.

¹⁷ O yieninlieba yaaba n tie puoba den yedi: «Naomi baa bonjaga.» Bi den yini o Obedi. Wani n mali *Isayi, Isayi mo mali Dafidi.

Dafidi yaajanba yela

¹⁸ Peletisa yaabila yela n tie ne: Peletisa den mali Hetisiloni.

¹⁹ Hetisiloni mo den mali Lami, Lami n maa Aminadabi,

²⁰ Aminadabi mo n maa Nasoni, Nasoni n maa Salima,

²¹ Salima mo n maa Boasa, Boasa n maa Obedi,

²² Obedi mo n maa Isayi, Isayi n maa Dafidi.