Pisomi 9 - Gourmanchéma Bible

¹ Bi yanyanba yudaano yani siiga yanbu. Dafidi yanbu yaabu n yiini leni ki nialiñiliga.

² N baa kpiagi Li Miali Diedo leni n pali kuli N baa togidi a tuonŋama kuli.

³ N baa mangi n pali a yeli nni, Leni li pamancianli, N baa yiini ki kpiagi a yeli Fini U Tienu n yua n ye hali tanpojoma.

⁴ N yibalinba sudi ki goa puoli, Ki tuudi ki baa ki bodi a nintuali.

⁵ Kelima fini n koani ki gaa nni ki saa npo i moamoani. A ka ti gbandi po ki ja yaa buudi n tiegi.

⁶ A fu leni i nilanbuoli, a baa teni o nibiado n kpe. A baa duuni ki ñani bi yela yaa yogu n tu yaa yogu kuli po.

⁷ Yibalinba kuli bodi, bi diedi tua diegbendi yaa yogunu kuli po. Ŋan bolini yaa dogi kuli, bi kan go tiadi yi po.

⁸ Li Miali Diedo ka ti gbandi po yaa yogu n tu yaa yogu. O bili o bali kalikaanu li bujiali po.

⁹ Wani n gobidi li ŋandunli leni mi *teginma, Ki ja ti buudi bi niba po nani lan pundi maama.

¹⁰ Li Miali Diedo n tua kaanpaalu ban mabindi yua po, Ki tua kaanpaalu li paboanli daali.

¹¹ Yaaba n bani a yeli dugi apo, Kelima fini Li Miali Diedo ŋaa ŋaani yaaba n lingi a.

¹² Yiini mani ki kpiagi Li Miali Diedo yua n ye Siyono. Togidi mani bi niba nintuali o tuoncianŋama.

¹³ Kelima o baa tu i panpaani yaa soama n wuli po, O tiani mipo, o kan sundi bi niñinniba moe.

¹⁴ Gbadi npo mi niñima, fini Li Miali Diedo! Diidi ki le yaaba n nani nni n wangi nni yaa fala, Fini yua n faabi nni leni mi kuuma,

¹⁵ Ke min fidi ki togidi a pagidi kuli Siyono dogu buliñoana kani, Ki mangi n pali a *faabima po.

¹⁶ I nilanbuoli jiidi ban gbini yaa buogu nni, Bi taana mo ŋma ban wuoni ki dia yaa diagu nni.

¹⁷ Li Miali Diedo doagidi wan tie yua, o saagi i moamoani. O nibiado n dia yaa diagu goa ki cuo o. *Joma.

¹⁸ Bi nibiadiba baa guani bi tinkpiba diema nni, Bani yaa nibuoli n sundi U Tienu yeni.

¹⁹ Ama U Tienu kan sundi o luodo po abada, Bi niñinniba mo yaa suginma kan bodi baa lan waagi maama kuli.

²⁰ Fii ki sedi, Li Miali Diedo, ke o nisaalo n da paadi. Teni i nibuoli buudi n jia a nintuali.

²¹ Li Miali Diedo, teni ti jawaandi n cuo ba I nibuoli n bandi ke bi li tie nisaaliba bebe. Joma.