Pisomi 88 - Gourmanchéma Bible

¹ Kole buolu yaaba yanbu. Bi yanyanba yudaano yani siiga yanbu yaabu n yiini leni li paboanli nialu. Selaka buolu yua Emana yanbu.

² Li Miali Diedo n Tienu, n faabika. N kpaani ki miadi a todima, U yensiinu leni ku ñiagu kuli.

³ Gbadi npo n jaandi, Diadi a tubili ki cengi min kpaani ki miadi a yaala!

⁴ N laa fala buoli kuli n yema nni, Mii go foagi leni mi kuuma.

⁵ Bi coadi ki taagi nni leni yaaba n jii mi kuuma buogu nni, N di tie nani yaa nilo n ki go pia fidu yeni.

⁶ N di dua bi tinkpiba siige, Ki naani leni ban ku yaaba ke bi dua a kula nni yeni. Ŋaa go faami bipo, ŋaa go tiendi bipo liba kuli.

⁷ A luni nni ku buoñuangu nni, Mi kuuma biigicianli nni.

⁸ A pabienli jagi n yuli po, Nani a ñingola yeni ki coagi nni boncianla.

⁹ A teni ke min maani leni yaaba sani ki ŋaa nni. A teni ke n tua nani ban sengi yaala yene. Diidi, n ye fala nni ki kan fidi ki ña lienni

¹⁰ N nuni dingidi kelima li paboanli po. Daali kuli Li Miali Diedo n yi ŋa ke ŋan cua ki todi nni. N tandi n nii apo ki jaandi a.

¹¹ Naani bi tinkpiba po yo ke a baa tieni mi bancianma? Naani bi baa fii ki pagi a. *Joma

¹² Naani bi baa togidi a *ŋanbili li kuli nni, Bi ki togidi a moamoani mi kuuma *kulu nni?

¹³ Naani laa *biigili kaanu bi bani a bancianma po? Naani mi yansuma diema yeni niinni bi bani a *teginma po?

¹⁴ Ama mini n kpaani ki miadi fine mi todima, Tiŋaagu kuli n jaandi a.

¹⁵ Li Miali Diedo be teni ke a yie nni? Be teni ke a buli nni a nunga?

¹⁶ Hali n bonwaama nni, n tie niñinnilo yo, Ki nagi mi kuuma. A jiendi nni hali boncianla, ki teni ke n yama paagi.

¹⁷ A pabiencianli jagi n yuli po, A jawaanciandi fii ki bolini nni.

¹⁸ Ti gaani ki lindi nni nani a ñingola yeni daali kuli. Li taani ki ŋuagini nni yenma.

¹⁹ A teni ke n danlinba leni n yegininlieba kuli sani ki ŋaa nni. Li biigili bebe n di tie n yegininlielo.