Pisomi 71 - Gourmanchéma Bible

¹ Li Miali Diedo, n sani ki wuoni a yaa kane, Da teni min fiagi.

² A *teginma po, gaa nni, ki faabi nni. Diadi npo a tubili ki faabi nni.

³ Tua npo min baa fidi ki wuoni yaa tangu kani. A yedi min yaa kpendi ki da cedi Ki baa ki faabi, Kelima a tie n tangu leni n kaanpaalu.

⁴ N Tienu, teni min ciadi o nibiado nuu nni Leni bi tugumoandanba leni bi nikpaba nuu nni.

⁵ Kelima Li Miali Diedo n Tienu, fini n tie n suginma! N dugi apo hali n bonwaama nni.

⁶ Hali n naa tugu nni n dugi a yaa po yo Fini n teni ke n ñani n naa tugu nni. Fini n tie min baa yaa pagi yua yogunu kuli.

⁷ N tie bi niba boncianla po bonpakikaala. Fini n tie n wuonkaanmoanu yu n pa.

⁸ N ñoabu n yaa gbie leni a pagidi, Leni a jigidi daali kuli!

⁹ Da lu nni min podi yaa yogunu. N gbanmanu yaa wadi, da ŋa nni.

¹⁰ Kelima n yibalinba maadi n maama Yaaba n bua ki ñani n miali juogi leni biyaba

¹¹ Ki tua: «U Tienu ŋaa o Ŋoadi ki deli ki cuo o mani. Niloba naa ye ki baa faabi o.»

¹² Ŋain U Tienu, da foagidi leni nni! U Tienu, jaligi ki cua ki faabi nni.

¹³ Yaaba n bua ki ñani n miali n fiagi ki bodi! Yaaba n lingi npo yaala n bia, I fe n ŋuagini ba, ban fiagi ki tibini bi yula.

¹⁴ Ama mini wani, n baa yaa pia mi suginma. N baa yaa yiini ki pagi a ki pugidi.

¹⁵ N ñoabu baa yaa togidi a teginma leni a *faabima daali kuli, Kelima mii bani li coali n de maama.

¹⁶ N baa togidi Li Miali Diedo U Tienu N tuuni o tuonciama maama. N baa tiadi ki maadi fini bebe yaa teginma maama.

¹⁷ U Tienu a bangi nni hali n bonwaama nni, Hali moala n baa yaa togidi a bancianma.

¹⁸ U Tienu, ŋan da ŋa nni, Baa n yaa ti podi ke n yudi pendi. Lani n tie min yaa wangi yaa nifiima n tie na a paalu, Ki togidi a paaciamu maama yaa nifiima n ŋua.

¹⁹ U Tienu, a teginma kpedi hali boncianla, Kelima a tieni yaa bonla n yaba. U Tienu, ŋme n naani leni a.

²⁰ A den teni ke ti laa li paboanli Leni i falabiadi buoli boncianla, Ama a baa goa ki pa ti li miali. A baa teni tin ña hali ki tinga *kuli kuli nni.

²¹ Pugini n yabinu Go baagi nni ki pugini.

²² N baa pagi a leni ku kogidigu. N Tienu, n baa yiini a *ŋanbili po. N baa pagi a leni ku kogidigu fini Isalele Tienu yua gagidi ki ŋani.

²³ N yaa yiini ki pagi a yaa yogunu n pali baa yaa mani. N pali baa yaa mani hali boncianla kelima a faabi nni.

²⁴ Daali kuli n lanbu baa maadi a teginma maama, Kelima yaaba n bua n kuuma kuli i fe cuo ba ke bi fiagi.