Pisomi 52 - Gourmanchéma Bible

¹ Bi yanyanba yudaano yani siiga yanbu. Dafidi yanbu.

² Li maadi Edomi yua Doyega n den waani Sayula ke Dafidi ye Ahimeleki kani.

³ Be teni ke a gbengidi a yuli a biadima po Fini o tugumoandaano? U Tienu *ŋanbili ye yaa yogunu kuli.

⁴ A lanbu ki pia matoama kuli se mabiadima bebe, Ki mani nani ku pengu yeni. A pia i janbi.

⁵ A bua mi biadima ki cie yaala n ŋani. A faadi i boandi moko ki cie i moamoani. *Joma

⁶ A bua yaa maama n baa bolini o nilo, A lanbu pia i boandi.

⁷ Lani yaa po U Tienu baa bolini a yaa yogunu kuli po. O baa guli a ki dadi ki ñani a a gbandieli nni. O baa ñani a bi nifuodiba tinga nni.

⁸ Bi niteginkaaba baa le o li fangili n cuo ba Bi baa laa o ti laadi ki yedi:

⁹ «Diidi mani yua n ki den teni ke U Tienu tie o gaaka. Ama ki den dugi o piacianma po Ki den guuni o yuli leni o janbi.»

¹⁰ Mini wani ye U Tienu diegu nni Nani *olifie tibu yaabu n pia li fabunli yeni. N dugi U Tienu ŋanbili po yaa yogu n tu yaa yogu.

¹¹ N baa pagi a bonŋanla, Kelima ŋan tieni yaala kuli yaa po. U Tienu, n baa yaa dugi fini yaa po yo, kelima a ŋani a *nidugikaaba kuli po.