Pisomi 4 - Gourmanchéma Bible

1 Bi yanyanba yudaano yani siiga yanbu.

¹ Bi yanyanba yudaano yani siiga yanbu. Dafidi yaa yanbu ke bi yiini bu leni ti kogiditi.

² N yaa kpaani ki yini a, Guani npo, U Tienu, fini yua n tie n *teginma. N paboanli nni, a todi nni. Gbadi npo mi niñima, ki ga n jaandi.

³ Yinba bi niba ne, hali u laa yogunu yo Ke yi baa teni n kpiagidi n tua fe? Hali be yogunu yo ke yi baa yaa bua yaa bonla n tie fanma, Ki go pua mi faama?

⁴ Yin nan bandi mani ke Li Miali Diedo gandi o *nidugika. Li Miali Diedo cengi n yaa kpaani ki miadi o yaa yogunu. *Joma

⁵ Baa yi pala yaa fii, yin da tieni mani *tuonbiadi. Yin kpaagi mani ku ñiagu yi duani nni, Ki go yaa ŋmini mani suo. Joma

⁶ Padi mani yaa pada n tiegi Li Miali Diedo po. Piani mani Li Miali Diedo yi yula.

⁷ Bi niba boncianla tua: «Ŋme n baa teni tin baa mi yemanma?» Teni a nunga yenma n yendi ti, fini Li Miali Diedo.

⁸ A puni nni yaa pamanli n cie Ban pia yaa pamanli bi *ŋalikama leni bi daama nni.

⁹ Lani n teni ke n yaa duani yaa yogunu, N baa guani leni mi yanduanma, Kelima Li Miali Diedo, fini bebe n kubi nni bonŋanla.