Pisomi 2 - Gourmanchéma Bible

¹ Be n teni ke bi nilanba fii ki tiendi ku fuugu Ke i nibuoli mo pia laa yantiabiada?

² Ki tinga badiba kuli fii ki sedi. Bi badijaba mo taani ki tuu ñoayenbu Ki fii ki sedi Li Miali Diedo Leni wan gandi yua po ki tua:

³ «Tin dadi ki cie ban luo ti leni yaala Ki faabi ti yula leni bi kpaadi.»

⁴ Yua n kaa ti gbandi po tanpoli laa ba ti laadi, O Diedo ñuadi ba.

⁵ O maadi leni ba o pabienli nni Ki jiendi ba o pabienkandikaali nni, ki yedi:

⁶ «Mini n gagidi n bado ki kaani o Siyono joagagidikaali yuli po.»

⁷ N baa kpaani Li Miali Diedo ñoabonli. O yedi nni: «A tie n bijua. Mini n mali a dinla.

⁸ Mia nni, n baa pa ŋa i nibuoli ban tua a faali, Ki teni ŋan diedi hali i tinbiani moko.

⁹ A baa mudi ba leni ti kudi gbiamu, Nani o maado bobili yeni, a baa mudi ba yomi yomi.»

¹⁰ Moala yinba bi badiba baa mani mi yanfuoma, Yinba ki tinga bujiaba, ga mani i tundi.

¹¹ Soani mani Li Miali Diedo po leni li fangili Mangi mani yi pala, ki yaa digibi mani.

¹² Pugi mani bijua, Wan da ti bieni o pali Ki teni yin bodi cain, Kelima o pabienli jaligi. Li pamanli ye leni yaaba n sani ki wuoni o kani.