Pisomi 144 - Gourmanchéma Bible

1 Dafidi yanbu.

¹ Dafidi yanbu. N pagi Li Miali Diedo n tanciangu Wani yua n bangi nni bu toabu Ki bogini nni mi janjanma po.

² O tie yua n ŋanbidi npo ki go tie n kaanpaalu N wuonkaanu yu n kpedi leni n faabika, N gbankoandigu min sani ki wuoni yua yaa kani. Wani n teni ke n niba tuo n yedima.

³ Li Miali Diedo, o nisaalo tie be yo, Hali ke a baa faami opo? O nisaalo biga wan tie be yo hali ke a baa tiani opo?

⁴ O nisaalo tie nani mi fuoma yeni O miali dana mo tie nani u soangu n tiini maama yeni.

⁵ Li Miali Diedo, kpegini tanpoli ki jiidi, Ki sii a juana ki teni ke ŋan yaa ña i muñii.

⁶ Teni i tañigi n ñigi ki yadi n yibalinba, Toa a piemi ki deli bi toagola.

⁷ Tandi a nii hali tanpoli po Ki faabi nni, ki ñani nni mi ñincianma nuu nni Leni bi canba nuu nni,

⁸ Bani yaaba yaa ñoana n maadi mi mafanma Ke bi nijieni mo gbie leni i janbi.

⁹ U Tienu, n baa yiini apo yanpanbu N baa yiini ki pagi a leni joma piiga kogidigu ki yedi:

¹⁰ «Wani n puuni bi badiba mi *faabima Ki faabidi o naacemo Dafidi leni ki jugisiebiadiga.»

¹¹ Faabi nni ki gaa nni Bi canba yeni nuu nni, Bani yaaba yaa ñoana n maadi mi mafanma Ke bi nijieni mo gbie leni i janbi yeni.

¹² Ti bijaba tie nani ku tibigu Yaaba n kpedi bi panma nni yeni. Ti bisiaba mo ŋani nani Ban kpie ki ŋanbi yaa benjielu ku badidiegu po yeni.

¹³ Ti buabuana gbie Leni ti kpaandi buoli kuli. Ti yanbidi mo pili ki pugidi tudatuda Ki go pili ki pugidi tuda piiga piiga i kuani nni.

¹⁴ Ti ne mo noadi bonŋanla. Bilinu kan go padi, Bi kan go cuo ti ti yonbidi, Bubula mo kan go pua ti daamu nni.

¹⁵ Li pamanli ye leni yaa nibuolu n baa laa *ŋanbili! Li pamanli ye leni yaa nibuolu ke Li Miali Diedo n tie bi Tienu!