Pisomi 141 - Gourmanchéma Bible

1 Dafidi yanbu.

¹ Dafidi yanbu. Li Miali Diedo, n kpaani ki mia ŋa, jaligi ki cua ki todi nni! Diadi a tubili ki cengi n nialu min miadi a yaa yogunu!

² N jaandi n do ki pundi a kani nani a *dugibila muñii yeni, Min yugidi n nuu ki miadi a yeni Lan yaa tie nani ku yenjuogu padili.

³ Li Miali Diedo, yaa gobidi npo n ñoabu Ki kubi n ñoacuuna mo!

⁴ Da pegidi n pali mi biadima po, Ke min da taani leni yaa niba n bia Ki tieni a tuongunda. Da teni min leni baa bi jemanma.

⁵ O niteginka yaa pua nni, li tie npo ŋamu yo, O yaa funi leni nni, li tie tulale kpame n yuli po. N yuli mo kan jigi lipo. Ama n baa fii ki sedi bi nibiadiba biadima po leni n jaandi.

⁶ Ban pieni ki lu bani bi nibiadiba yeni yudanba mi joayidima po. Lani bi baa bandi ke n pia moamoani.

⁷ Nani ki tinga n yen toa i yiani maama Bi tinkpiba diema moko baa yaadi mi ñoabu ki nali bi kpaba yeni.

⁸ N Diedo Li Miali Diedo, n nuni pegidi ki nua fine. N sani ki wuoni a yaa kane Da teni min kpe.

⁹ Faabi nni leni ban dia nni yaa diagu, Leni yaaba n tiendi mi biadima tela nni,

¹⁰ Bi nibiadiba yeni n goa baa bi diadi nni, Ke mini mo n fidi ki ŋmadi.