Ose Tili 2 - Gourmanchéma Bible

¹ Ama Isalele yaaba baa yabidi nani mi ñincianma balinma tanbiima, ban kan fidi ki biigi yaama ki buali ki coadi ma. Ban den tua yaa nibuolu: «Yii go tie n niba,» Bi baa yedi ba: «Yi tie U Tienu yua n fo yaa bijaba.»

² Lanwani Juda yaaba leni Isalele yaaba go baa guani ki taani, Ki dini badiyendo. Bi baa tua mi diema danba. Kelima Jisileeli daali yeni baa tua dacianle.

³ Lanwani, yini mani yi naataanjaba “N niba” yini yi naataanpola mo “Ban bua yaaba bonŋanla.” U Tienu yedi:

Isalele yaaba ŋa U Tienu

⁴ «Bu mani leni yi naa, bu mani leni o, Kelima waa go tie n pua, Nmo ki go tie o calo. Wan ñani o nunga nni leni o biina siiga o *conconma maalima.

⁵ Lani yaaka, n baa yiedi o mubima, Ki ŋa o o naa n mali o maama. N baa teni o diema n tua fanpienma, Ñima n ki ye yaa tinga nni. N baa teni wan kpe ñunñuunu.

⁶ N kan gbadi o bila mo po niñima, Kelima o ciba tie poconconbila.

⁷ Bi naa puni o yuli mi conconma po, Wani yua n mali ba yeni tiendi yaala n pia i fe, Ki tua: ‹N baa yaa ŋua n jaconcona, Bani yaaba n puuni nni n jiema leni n ñima, N pekobidi leni n *len, N kpama leni n daama.›

⁸ Li tie lani yaa po ke n baa pigini o sanu leni i konkoni, N baa maa u bilinu ki pigini u. O kan go le o sani.

⁹ O baa sani ki ŋoadi o jaconcona, Ama o kan nandi ba. O baa lingi ba, Ama o kan le ba. Li yaa puoli, o baa yedi: ‹To! N baa guani n cakpelo po, Kelima min den ye o kani, Li den mani nni ki cie moala.›

¹⁰ Waa den bani ke mini n den puuni o *ŋalikama leni o duvenpaano leni mi kpama. Waa bani ke mini n den bibini o wan den taa yaa ŋanjilifa Leni yaa wula ki puni o *bulo *Baali yeni.

¹¹ Li tie lani yaa po ke n baa gaa n ŋalikama u jetaagu yogunu, Ki fie n duvenpaano mo duven tiidi bonluonkaala ciema yogunu. N baa fie n pekobidi leni n len, Wan baa taa lani yaala ki pali, Ki lu ti tiayiekaadi ki yie ki wuoni o mubima yeni.

¹² N baa yiedi o mubima, O jaconcona nintuali. Oba kuli mo kan fidi ki faabi o n nuu nni.

¹³ N baa teni yaala n bi tie o pamanli kuli n gbeni, Lani n tie a bina *jaanma, Wan jaani yaa jaanma ŋmapaano kuli, Mi fuodima dana leni o taanciama kuli.

¹⁴ N baa bolini o duven tiidi leni o kankandi, Wan maadi yi yaa maama Ki tua: ‹N jaconcona n pani nni yaa panpaani nna.› N baa teni likani n tua fuali, Ti moayandi mo n ŋmani i tiidi yeni.

¹⁵ N baa waani o fala, Kelima wan den sundi npo yaa dana Ki padi ki siagi o bulo Baali po Leni butoe po yaa sinma yaa muñii n pia u nuulimanu, Leni wan den pili o ñoagima, ki laa o laani yaa dana Ki tiini ki ŋua o jaconcona, Ki sundi mini U Tienu po. Mini Li Miali Diedo n yedi yeni.» U Tienu yedi:

U Tienu n pia yaa buama o niba po

¹⁶ «Lanwani, n baa teni o yama n goa ki kua n niinni, Min gedini o mi fanpienma nni, Ki ban maadi o mi buama maama.

¹⁷ Lanwani n baa guani o o duven tiidi kuani, Ki teni Akoli joaloangu mo n tua mi suginma buliñoabu. Lankani, o baa tuo ki yaa ŋua nni, Nani o jafandi yogunu, Nani wan den ñani Ejipiti yaa yogunu.»

¹⁸ Li Miali Diedo yedi: «Laa yogunu, o baa yini nni o calo. O kan go yini nni: “Baali o daano.”

¹⁹ N baa ñani o ñoabu nni Baali leni yaa buli n sieni kuli yela. Bi kan go tiadi baa bi yela mo.

²⁰ Laa yogunu, n baa kuani n niba po o *ŋantaado Leni ti moayandi, Leni ti bonyugiditi Leni yaala n balini ki tinga po. N baa bolini mi diema nni a dabana, Mu jugisiemu leni ti toatiadi kuli, Ki teni n niba n yaa goa ke bi jigi mo n yaa co.

²¹ Isalele yaaba, n baa yaa tie yi togibaa yaa yogunu kuli po, N baa yaa tie yi togibaa Ki yaa ŋua yaa bujiali n tiegi leni mi teginma. N baa yaa tie yi togibaa leni mi buama leni mi niñingbadima.

²² N baa yaa tie yaa togibaa n kubi o ñoaniani, Yimo baa bandi mini Li Miali Diedo.» Li Miali Diedo yedi:

²³ «Laa yogunu, n baa tua yaa Tienu n guandi bu miabu N baa pa tanpoli wan bua yaala, Tanpoli mo n pa ki tinga kan bua yaala.

²⁴ Ki tinga mo n pa ŋalikama, Leni o duvenpaano leni mi kpama ban bua yaala. Lani mo kuli n pa Jisileeli wan bua yaala.

²⁵ N baa buli Jisileeli mi diema nni, Yua n den yi “Ban ki gba yua po mi niñima” yeni, N baa gbadi opo mi niñima. N baa yedi yua n den yi “Baa tie niba” yeni, N baa yini o: “N niba”, Bimo baa yini nni: “Ti Tienu.”»