Nehemi 8 - Gourmanchéma Bible

¹ O cileleelo n den ñani, Isalele niba yaaba n den ye bi dogi nni kuli den cua. Bikuli den taani leni yanyenma yaa fanma n tiegi u dogu bilinciamu buliñoabu, Ñima Buliñoabu kani. Bi den yedi li *bali maama bangika Esidilasi, ke wan taa Musa bali maama tili, U Tienu n den teni Isalele yaaba yaa bali maama yeni ki cuani.

² Wani o kopadiciamo Esidilasi den taa li bali maama tili ki cuani li nitaanli kani, bani bi jaba leni bi puoba leni yaaba n baa fidi ki ga mi maama kuli. Li den tie o cileleelo dakpiali daali.

³ Esidilasi den se yaa fanma n tiegi u dogu bilinciamu buliñoabu yaabu n yi mi Ñima Buliñoabu kani ki cogi li tili yeni ki cili ku tiŋaagu ki yaa caa hali u yensiinu, ke bi jaba leni bi puoba leni yaaba n baa fidi ki ga mi maama kuli ye likani. Bi niba kuli den cengi bonŋanla wan cogi yaala.

⁴ Esidilasi den doni ki se ban den taa ti daadi ki ŋanbi yaa sedikaanu li taanli yeni po. Matitia leni Sema leni Anaya leni Uli leni Hilikiya leni Maaseja den se o jienu po ki baali o, ke Padaja leni Mikayeli leni Malikiya leni Hasumi leni Hasibadani leni Sakali leni Mesulami mo se o ganu po.

⁵ Esidilasi n den gbabidi li tili yeni, bi niba kuli den nua, kelima wan den se naankani yeni, o den kpedi ki cie bi niba kuli. Wan den gbabidi li, bi niba kuli den fii ki sedi.

⁶ Esidilasi den jaandi ki kpiagi Li Miali Diedo U Tienu yua n yaba. Bi niba kuli den yugidi bi nii ki yedi: «Amina, Amina,» ki labini tiipo ki kpiagi Li Miali Diedo.

⁷ Li yaa puoli, Josue leni Selebia leni Jamini leni Akubi leni Sebetayi leni Hodija leni Maaseja leni Kelita leni Asalia leni Josabadi leni Hanani leni Pelaya leni Lefi buolu yaaba den bundi bi niba po li bali maama, ke nilo kuli se o kaanu.

⁸ Bi den cogi U Tienu bali maama tili bon;nanla, ki go bundi ke bi niba kuli n fidi ki ga ban cogi yaala.

⁹ Nehemi, yua n den tie gufeneeli, leni li bali maama bangika Esidilasi, yua n go den tie o kopadiciamo, leni Lefi buolu yaaba, yaaba n den bangi bi niba yeni, den yedi bi niba kuli: «Dinla yaa daali gagidi Li Miali Diedo yi Tienu po. Yin da boandi yi pala ki yaa buudi yeni,» kelima bi niba kuli n den gbadi li bali maama n yedi yaala, bi den buudi.

¹⁰ Bi go den yedi ba: «Kuni mani ki ban ŋmani yaa nandi n pia mi kpama, ki ño yaa bonñokaala n mani, ki boagidi mi jiema ki teni yaaba n kaa pia, kelima dinla tie yaa daali n gagidi ti Diedo po. Da boandi mani yi pala kelima Li Miali Diedo n puuni yaa pamanli tie yi fidu.»

¹¹ Lefi buolu yaaba moko den duani bi niba kuli yama ki yedi ba: «Suo mani, kelima dinla tie yaa daali n gagidi. Da boandi mani yi pala.»

¹² Lanwani bi niba kuli den kuni ki ban dini ki go ñuni, ki soani mi jiema yaaba n ki pia po, ki mangi bi pala boncianla, kelima bi den ga ban den bundi bipo yaa maama.

A koasuga jaanma

¹³ Li dalieli daali Isalele yaaba kuli diedanba leni bi kopadicianba leni Lefi buolu yaaba den taani li bali maama bangika Esidilasi kani ki baa cengi U Tienu bali maama bundima.

¹⁴ Bi den laa ke li diani U Tienu n den teni Musa yaa bali maama nni ke Isalele buolu yaaba baa yaa ye a koasuga nni o cileleelo yaa *jaanma yogunu,

¹⁵ ki go kpaani bi dogi nni kuli leni Jelusalema nni ki yedi: «Gedi mani a juana po ki ban baa *olifie tiidi beni, ban ko yaa olifie leni li fuali po yua yaa beni, leni militi tiidi yaa beni leni i kpakpatiidi yaa beni leni yaa tiidi n pia ti faadi boncianla kuli yaa beni, ki tii a koasuga nani lan diani maama.»

¹⁶ Lanwani bi niba kuli den gedi ki ban baa i beni ki tii a koasuga bi diena yula po, leni bi luoli nni, leni U Tienu diegu luoli nni leni u bilinciamu buliñoabu, mi Ñima Buliñoabu fanma nni, leni yaabu n yi Efilayima Buliñoabu yaa fanma nni kuli.

¹⁷ Yaa nitaanli n den ñani ti yonbidi kuli den tii a koasuga ki ye a niinni. Ki cili Nuni bijua Josue yogunu, ki pundi hali laa daali, Isalele buolu yaaba naa den jaani laa jaanma buolu. Bi den mangi bi pala hali boncianla.

¹⁸ Bi den cogi bipo U Tienu bali maama tili daali kuli, ki cili mi jaanma cilidaali ki ban pundi hali mi juodima daali. Bi den jaani laa jaanma dana lele, ki taani taancianli li daniili daali nani lan den bili maama.