Nehemi 7 - Gourmanchéma Bible

¹ U bilinu n den gbeni ke n caani ti buliñoaluoditi, bi den teni a buliñoaguuda leni bi yanyanba leni Lefi buolu yaaba bi tuonli.

² N den teni ke n kpiilo Hanani leni Hanania gobidi Jelusalema. Hanania yeni den tie li toaguudidieli minteela yudaano. O den tie *nidugika ki fangi U Tienu ki cie bi niba boncianla.

³ N den yedi ba: «Bi kan luodi Jelusalema buliñoana ke u yienu ki yugidi. Ku yenjuogu mo bi baa luoni ti buliñoaluoditi leni li bonluonkaala hali ke a buliñoaguuda daa fuadi. Jelusalema yaaba baa yaa guudi, yua kuli baa yaa se o diegu nintuali ki guu.»

Isalele yaaba yaaba n guani Juda diema nni coali

⁴ Jelusalema dogu den pia mi fanma boncianla ki go yaba, ama u niba naa den fuu, ti diedi mo ki den maa.

⁵ N Tienu den kuani n yama nni ke min taani bi paatieba leni li bali danba leni bi niba kuli ki coadi ba. N den taa yaa tili n pia yaaba n den kpa guani yela. N den laa lienni yaala n tie ne:

⁶ Babilona bado Nebukanesa n den cuo ki gedini yaaba ti yonbidi siiga boncianla den goa ki kuni Jelusalema leni Juda diema nni. Yua kuli den kuni o denpo.

⁷ Yaaba n den gobidi ba den tie Solobabeli, Josue, Nehemi, Asalia, Laamika, Nasamani, Malidoke, Bilisani, Misipeleti, Bigifayi, Lehumi leni Baana. Isalele yaaba buoli leni bi coali nne:

⁸ Paleyosi buolu yaaba den tie tudalie n kobiga n piilele n jaba lie (2 172).

⁹ Sefatia buolu yaaba: kobitaa n piilele n jaba lie.

¹⁰ Alaki buolu yaaba: kobiluoba n piimuu n jaba lie.

¹¹ Pasati-Moabi buolu yaaba bani Josue leni Joabi yaabila: tudalie n kobinii n piiga n jaba nii (2 818).

¹² Elami buolu yaaba: tudili n kobilie n piimuu n jaba naa (1 254).

¹³ Satu buolu yaaba: kobinii n piinaa n jaba muu.

¹⁴ Sakayi buolu yaaba: kobilele n jaba piiluoba.

¹⁵ Binuyi buolu yaaba: kobiluoba n piinaa n jaba nii.

¹⁶ Bebayi buolu yaaba: kobiluoba n piilie n jaba nii.

¹⁷ Asigadi buolu yaaba: tudalie n kobitaa n piilie n jaba lie (2 322).

¹⁸ Adonikami buolu yaaba kobiluoba n piiluoba n jaba lele.

¹⁹ Bigifayi buolu yaaba: tudalie n piiluoba n jaba lele (2 067).

²⁰ Adini buolu yaaba: kobiluoba n piimuu n jaba muu.

²¹ Esekiasi yaabili Ateli buolu yaaba: piiyia n jaba nii.

²² Hasumi buolu yaaba: kobitaa n piilie n jaba nii.

²³ Betisayi buolu yaaba: kobitaa n piilie n jaba naa.

²⁴ Halifi buolu yaaba: kobiga n piiga n jaba lie.

²⁵ Yaaba n den ñani Gabaono, piiyia n jaba muu.

²⁶ Betelema leni Netofa dogi yaaba: kobiga n piinii n jaba nii.

²⁷ Anatoti dogu yaaba: kobiga n piilie n jaba nii.

²⁸ Beti-Asimafeti dogu yaaba: piinaa n jaba lie.

²⁹ Kilijati-Jealima leni Kefila leni Beeloti dogi yaaba: kobilele n piinaa n jaba taa.

³⁰ Lama leni Geba dogi yaaba: kobiluoba n piilie n jayendo.

³¹ Mikimasi dogu yaaba: kobiga n piilie n jaba lie.

³² Betela leni Ayi dogi yaaba: kobiga n piilie n jaba taa.

³³ Nebo-toa dogu yaaba piimuu n jaba lie.

³⁴ Elami toa buolu yaaba: tudili n kobilie n piimuu n jaba naa (1 254).

³⁵ Halimi buolu yaaba: kobitaa n jaba piilie.

³⁶ Jeliko dogu yaaba: kobitaa n piinaa n jaba muu.

³⁷ Lodi, Hadidi leni Ono dogi yaaba: kobilele n piilie n jayendo.

³⁸ Sena dogu yaaba: tudataa n kobiyia n jaba piitaa (3 930).

³⁹ Bi kopadicianba den tie Yedayeya buolu yaaba bani Josue yaabila: kobiyia n piilele n jaba taa.

⁴⁰ Imeli buolu yaaba: tudili n piimuu n jaba lie (1 052).

⁴¹ Pasuli buolu yaaba: tudili n kobilie n piinaa n jaba lele (1 247).

⁴² Halimi buolu yaaba: tudili n piiga n jaba lele (1 017).

⁴³ Lefi buolu yaaba den tie Josue leni Kadimieli buolu yaaba, bani Hodifa yaabila: piilele n jaba naa.

⁴⁴ U Tienu diegu yanyanba den tie Asafi buolu yaaba: kobiga n piinaa n jaba nii.

⁴⁵ A buliñoaguuda den tie Salumi buolu yaaba, Ateli buolu yaaba, Akubi buolu yaaba, Hatita buolu yaaba leni Sobayi yaa buolu yaaba: Bikuli den taani ki tie kobiga n piitaa n niba nii.

⁴⁶ U Tienu diegu naacenba den tie Tisisa buolu yaaba, Hasufa buolu yaaba leni Tabaoti buolu yaaba,

⁴⁷ Kelosi buolu yaaba, Siaha buolu yaaba, Padoni buolu yaaba,

⁴⁸ Lebana buolu yaaba, Hagaba buolu yaaba, Salimayi buolu yaaba,

⁴⁹ Hanani buolu yaaba, Gideli buolu yaaba, Gahali buolu yaaba,

⁵⁰ Leyaja buolu yaaba, Letisini buolu yaaba, Nekoda buolu yaaba,

⁵¹ Gasami buolu yaaba, Usa buolu yaaba, Peseyaki buolu yaaba,

⁵² Besayi buolu yaaba, Mehunimi buolu yaaba, Nefisimi buolu yaaba,

⁵³ Bakibuki buolu yaaba, Hakufa buolu yaaba, Haluli buolu yaaba,

⁵⁴ Batisiluti buolu yaaba, Mehida buolu yaaba, Halisa buolu yaaba,

⁵⁵ Balikosi buolu yaaba, Sisela buolu yaaba, Tamaki buolu yaaba,

⁵⁶ Netisiaki buolu yaaba, Hatifa buolu yaaba.

⁵⁷ Salomono naacenba puoliŋuani den tie Sotayi buolu yaaba, Sofeleti buolu yaaba, Pelida buolu yaaba,

⁵⁸ Jaala buolu yaaba, Dalikoni buolu yaaba, Gideli buolu yaaba,

⁵⁹ Sefatia buolu yaaba, Hatili buolu yaaba, Pokeleti-Hatisebayimi buolu yaaba leni Amoni buolu yaaba.

⁶⁰ U Tienu diegu naacenba leni Salomono naacenba puoliŋuani kuli den taani ki tie kobitaa n piiyia n jaba lie.

⁶¹ Yaaba n den ñani Teli-Melaki leni Teli-Halisa leni Kelubi-Adoni leni Imeli, ki kuni ki naa fidi ki doagidi ban tie yaa cuuna yaaba ki doagidi ke bi tie Isalele buoli yaaba n tie ne:

⁶² Delaya buolu yaaba, Tobija buolu yaaba leni Nekoda buolu yaaba. Bikuli den tie kobiluoba n piinaa n jaba lie.

⁶³ Bi kopadicianba siiga moko den pia yaaba n ki fidi ki doagidi ban tie yaa cuuna yaaba. Li den tie Hobaja buolu yaaba, Hakotisi buolu yaaba, Balisilayi buolu yaaba. Wani Balisilayi den yi yeni kelima o den taa Galaadi yua Balisilayi bisiaba siiga yendo.

⁶⁴ Bi den lingi a coada tila nni baa laa bi yaajanba yela. Bi den ñani ba li padili tuonli nni.

⁶⁵ Gufeneeli den yedi ke ban da je yaa padijiedi n *gagidi boncianla hali kopadiciamoba n baa diidi *Ulima leni Tumima ki le wan baa jagi yaala.

⁶⁶ Isalele yaaba, yaaba n den ñani ti yonbidi nni kuli den tie piinaa n tudalie n kobitaa n niba piiluoba (42 360),

⁶⁷ kaa taani bi naacenba leni bi potuada yaaba n den tie tudalele n kobitaa n piitaa n niba lele (7 337). Bi yanyanba mo den tie kobilie n piinaa n niba muu, bi jaba leni bi puoba. Bi den pia i taami kobilele n piitaa n bonba luoba, i*buomi kobilie n piinaa n bonba muu

⁶⁸ ti yuoyuodi kobinaa n piitaa n bonba muu leni i ŋunbi tudaluoba n kobilele n bonba piilie (6 720).

⁶⁹ Bi diedantianba den puni bu paabu U Tienu diegu tuonli po. Gufeneeli den puni wula bontantana tudili (1 000), tadiñokaamu piimuu, leni a kopadicianliada bona kobimuu n piitaa li tuonli yeni po.

⁷⁰ Bi diedanba n den puni yaala den tie wula bontantana tuda piilie (20 000) leni ŋanjilifa kilo tudalie n kobilie (2 200).

⁷¹ Isalele yaaba, yaaba n den sieni den puni wula bontantana tuda piilie (20 000), ŋanjilifa kilo tudalie (2 000) leni a kopadicianliada piiluoba n bona lele.

⁷² Bi kopadicianba, Lefi buolu yaaba, a buliñoaguuda, bi yanyanba leni ku niligu siiga nitoaba, U Tienu diegu naacenba leni Isalele yaaba, yaaba n sieni kuli den kakali bi dogi nni.