Nehemi 6 - Gourmanchéma Bible

¹ Hali ke n daa caani ti buliñoaluoditi, Sanbala leni Tobija leni Gesemi yua n den tie Alabi yua, leni ti yibalinba yaaba n sieni, den gbadi ke n goa ki maa u dogu bilinu ke bonli ki go ye.

² Lanwani Sanbala leni Gesemi den soani ke bi yedi nni: «Cua ne tin le tiyaba Ono joaloangu dogi nni.» Bi den jagi ke bi baa tieni nni yaala n bia.

³ N den soani a tonda ke bi ban yedi ba: «N pia tuoncianli ki baa soani, n kan fidi ki cua. N yaa ŋa li tuonli ki cua, li baa sedi.»

⁴ Bi den yini nni yeni hali taalima naa. Nmo den guani bipo maguankayenma.

⁵ Mi taamuuma Sanbala den soani n kani o naacemo ke o kubi yaa tili n kaa lo.

⁶ Li tili yeni niinni li den diani: «Mi maama yadi i nilanbuoli siiga ke fini leni a Jufilieba jagi yin fiini mi yiema. Li tie lani yaa poe ke yi goa ki maa u bilinu. Bi tua ke fini n baa tua bi bado. Gasimu moko yedi yeni.

⁷ Bi tua baa ke a gandi bi sawalipuaba yaaba n baa waani Jelusalema nni ke a tua Juda bado. Moala lani kuli baa pundi o bado kani. Lanwani cua ne tin taani ki juogi.»

⁸ N den teni ke bi yedi o: «Ŋan yedi yaala yeni tie faama. Fini n naani a cii.»

⁹ Laa niba kuli den bua ki jieni ti. Bi den tama ke ti gbani baa wudi tin cedi li tuonli. «Moala, n Tienu, ŋan pugini nni u fidu.»

¹⁰ N den gedi Mehetabeeli bijua Delaya yaa bijua Semayeja po kelima waa den fidi ki ñani o deni. O den yedi nni: «Tin gedi U Tienu diegu po ki ban kua u *kaangagidiŋamu nni ki luoni ku diegu buliñoana, kelima a yibalinba baa cua ku ñiagu ke bi baa kpa ŋa.»

¹¹ N den goa ki yedi: «Mii tie yaa nibuolu n baa sani! N buolu ne baa fidi ki kua u kaangagidiŋamu nni ki yaa ye? N kan kua.»

¹² N den bandi ke laa tie U Tienu n den soani o. O den maadi nni laa maama kelima Sanbala leni Tobija den suu o i ligi.

¹³ Bi den suu o i ligi ki tama ke n baa jie, ke n baa tuo o tundi ki tieni ti *tuonbiadi. Lanwani bi den baa baa ki biidi n yeli ki fiagi nni.

¹⁴ «N Tienu, ŋan tiadi Tobija leni Sanbala leni bi tuona po. Ŋan go tiadi o sawalipualo yua n tie pua ki yi Noadia leni bi sawalipuaba yaaba n sieni po, bani yaaba n den lingi ban jieni nni.»

¹⁵ U bilinu yeni den gbeni yaa ŋmaalo n yi Eluli piilie n damuuli daali, piimuu n dana lie siiga.

¹⁶ Ti yibalinba n den gbadi, yaa diema n den lindi ti kuli den jie boncianla ki tuo ke li tuonli den soani kelima U Tienu yanbuama po.

¹⁷ Laa dana siiga, li den pia Juda paatieba yaaba n dangi a tila ki tuuni Tobija po ki go gaani omo yaa.

¹⁸ Kelima Juda diema nni bi niba boncianla den tuugi leni o kelima o den tie Alaki bijua Sekania cuado, ke o bijua Yohanana mo den taa Belekia bijua Mesulami bisalo.

¹⁹ Bi den pagi o n nintuali mo, ki caa ki ban togidi o min maadi yaala. Tobija den tuuni a tila ki bua ki jieni nni.