Nehemi 5 - Gourmanchéma Bible

¹ Bi jaba leni bi puoba den yenbidi boncianla bi Jufilieba po.

² Bi nitianba den tua: «Tinba leni ti bijaba leni ti bisiaba, ti yaba. Ban pa ti *ŋalikama tin yaa di ki ye.»

³ Bine den tua: «Ti tendi ti kuani leni ti duven tiidi leni ti diedi ki fidi ki baadi ŋalikama mi koma yogunu.»

⁴ Toaba mo den tua: «Ti ledi i ligi ki dugi ti kuani po leni ti duven tiidi po ki baa pa o bado li lubili.

⁵ Ama tikuli taa buolu. Ti bila tie nani bi bila yeni. Ti teni ke ti bila kua ti yonbidi nni. Ti bisiaba boncianla kua ti yonbidi yeni niinni no. Tii pia kuli tin baa tieni maama kelima ti kuani leni ti duven tiidi kuli tie nitoaba yaala.»

⁶ Min den gbadi bi yenbidi leni laa maama kuli, n pali den beni hali boncianla.

⁷ N den jagi ke n baa fu leni bi paatieba leni li bali danba. N den yedi ba: «Yi tungi yi lieba be yaa tugikpiaga nne?» N den yini ki taani bi niba.

⁸ N den yedi ba: «Ti den goa ki da ki faabi ti kpiiba Jufinba nani tin fidi maama ban den kuadi yaaba bi nilanba po. Moala yinba yiba mo n nan di kuadi ba, ti buolu yaaba po!» Bi den ŋmini, kelima baa den pia ban baa guani yaala.

⁹ Lanwani n den yedi ba: «Yin tiendi yaala yeni ki ŋani. Yii bi baa yaa cuoni leni U Tienu fangili ka ke ti yibalinba bi nilanba n da sugi ti?

¹⁰ N moko n ledi ba i ligi leni ŋalikama, mini leni n kpiiba leni n naacenba kuli. Tin cedi ban da pa ban kubi tipo yaala.

¹¹ Dinla yin goa ki teni ba bi kuani, leni bi duven tiidi leni bi *olifie tiidi leni bi diena. Yin cabi ba yin den ledi ba i ligi leni ŋalikama leni mi kpama ki baa ti goa ki ga leni yaa ñuadi.»

¹² Bi den goa ki yedi: «Ti baa tieni ŋan yedi yaala. Ti baa guani ba tin ga yaala, ti kan buali ba pu kuli mo.» Lanwani n den yini bi kopadicianba ki teni ke bi pandanba poli bi nintuali ke bi baa tieni ban yedi yaala.

¹³ Lanwani n den yoyogi n liadicianli ki yedi: «U Tienu n yogi yaaba n kan tieni ban yedi yaala nande. Wan teni ban luo bi diedi leni bi bonpiakaala ki da pia pu kuli!» Li nitaanli den yedi: «Amina!» Bikuli den pagi Li Miali Diedo. Bi niba den tieni ban yedi yaala.

¹⁴ Hali o bado n den dini nni li bali yaa daali ke n tua gufeneeli Juda diema nni, ki cili o bado Alitakiselisesi bali binpiiliedi binli ki yaa caa hali o piitaa n binlieli, lani n tie piiga n bina lie, mini, bi n kpiiba oba ki den gaani gufeneeli n yen gaani yaa lubili.

¹⁵ Min ŋoadi yaa gufeneelinba puoli den coagini bi niba ki gaani bikani mi jiema leni duven kaa taa leni a kujapienpiinaada. Baa bi naacenbaanba den wangi bi niba fala. Ama mini mii tieni yeni kelima n fangi U Tienu.

¹⁶ N go den soani u bilinu goamaama tuonli mo. Tii da kuanuba, n naacenba mo kuli mo taa ki tuuni u bilinu yeni tuonli.

¹⁷ N den dindi niba kobiga n piimuu, Jufinba leni yaaba n tie bi siiga li bali danba kaa taa leni yaaba n den ña yaa nilanbuoli n lindi ti ki kpendi.

¹⁸ Daali kuli bi den yen kodi naatonyenli leni pegandike luoba leni ti bonyugiditi. Likuli den tie n yaa tugili. Dana piiga siiga kuli mo bi yen ŋanbi duven boncianla. Baa yeni, mii den buali gufeneeli n yen gaani yaa lubili kelima a tuona den tie bi niba po tugikpiagili.

¹⁹ «N Tienu, ŋan tiadi npo kelima min tieni bi naa niba po yaala, ki ŋanbi npo.»