Nehemi 4 - Gourmanchéma Bible

¹ Ama Sanbala leni Tobija leni Alabi yaaba leni Amoni buolu yaaba leni Asidodi dogu yaaba n den gbadi ke Jelusalema bilini ŋanbima tuonli cuoni bonŋanla, ke a bona kuli cili ki biindi, bi pala den beni boncianla.

² Bikuli den juogi ki tu ñoabu ki baa cua ki baa Jelusalema ki baa ban baa biidi biidi yaala.

³ Lanwani ti den mia ti Tienu, ki go guuni bi niba u yensiinu leni ku ñiagu kuli, ke bi yaa ti baa ti, tin moa ki ga ti yula.

⁴ Ama Juda buolu yaaba den tua: «Bi tuonsoanba gbanmanu gbeni, a tangbana mo yaba. Ti kan fidi ki maa u bilinu.»

⁵ Ti yibalinba mo den tua: «Bi kan bandi pu, bi kan le pu hali tin baan kua bi siiga ki kpa ba, ki teni li tuonli n sedi.»

⁶ Yaa Jufinba n den ye yaa dogi n nagi leni ti yibalinba yeni den cua taalima piiga ki tuodi ki waani ti, bani ti yibalinba yeni n jagi ke bi baa tieni ti yaala kuli.

⁷ Lani yaa po n den sieni bi niba yaa kaani n ñua ki pia u kaanpaalu u bilinu puoli po. Bi den taa ki ye likani buolubuolu ke yua kuli kubi o jugisiega leni o kpaanli leni o dabanli.

⁸ N den diidi diidi ki fii ki yedi bi paatieba leni li bali danba leni yaa niba n sieni kuli: «Yin da jie mani yi yibalinba. Tiadi mani o Diedo yua n yaba ki pia i jeje po, ki koani mani yi kpiiba po, leni yi bijaba leni yi bisiaba leni yi puoba leni yi diedi nni yaaba kuli po.»

⁹ Ti yibalinba den gbadi ke bi tuodi ki waani ti bi yanjagibiadili. U Tienu den bolini bi cili. Lanwani tikuli den goa ki tuuni u bilinu kani, yua kuli leni o yaa tuonli.

¹⁰ Hali lan daali, n naacenba siiga boagidima den tuuni ke boagidima mo kubi a kpaana leni ti gbankoanditi leni a dabana ki laa ti kudi liada. Bi yudanba mo den se Juda yaaba kuli puoli.

¹¹ Yaaba n den maa u bilinu leni yaaba n den tugi a tuga leni yaaba n den tungi ba, yua kuli den tuuni leni nuyendu ki kubi o toatiagu mo u lielu.

¹² Yua kuli den tuuni yeni ki go yie o jugisiega. Yua n den piebi li naatuntunli mo den se n kani.

¹³ N den yedi bi paatieba leni li bali danba leni yaa niba n sieni kuli: «Li tuonli yaba. Ti go yayadi ki lindi u bilinu ki foafoagi leni tiyaba.

¹⁴ Bi yaa pua li toagangaali, yin taani mani tikani yin gbadi ke bi pua naanpo. Ti Tienu baa koani tipo.»

¹⁵ Ti den tuuni li tuonli yene, ti siiga nni boagidima yua kuli den kubi o kpaanli ki cili ku tiŋapanpangu ki yaa caa hali ku ñiagu.

¹⁶ Laa yogunu n go den maadi leni bi niba kuli ki yedi ba: «Nili kuli n yaa dua Jelusalema nni, wani leni o naacemo. Tin yaa guu ku ñiagu ki tuuni u yensiinu.»

¹⁷ Tii den landi ti tiadi, mini leni n kpiiba leni n naacenba leni yaa guudikaaba n den yegi leni nni kuli. Nilo kuli den kubi o toatiadi leni mi ñima bebe.