Nehemi 3 - Gourmanchéma Bible

¹ Bi kopadicianba bado Eliasibi den fii, wani leni o kpiiba bi kopadicianba den maa i Pe Buliñoabu. Bi den gagidi bu U Tienu po, ki caani ti buliñoaluoditi. Bi den ŋanbi u bilinu ki pundi hali Meya Diefoagili, ki yaa caa hali Hananeeli Diefoagili.

² Jeliko yaaba leni Imili bijua Sakuli den maa ki tugini Eliasibi kani.

³ Senaa bijaba den maa i Jami Buliñoabu. Bi den pini bu, ki caani ti buliñoaluoditi, ki tieni li bonluonkaala leni yaa daadi n poandi ki luondi.

⁴ Hakotisi bijua Uli yaa bijua Melemoti den maa ki tugini bi kani. Mesesabeeli bijua Belekia yaa bijua Mesulami den maa ki tugini lankani. Baana bijua Tisadoki mo den maa ki tugini lankani.

⁵ Tekoa dogu yaaba mo den ŋoadi bani ki maa. Bi yudanba den yie ke li tuonli yudanba kan gobidi ba ban soani.

⁶ Paseyaki bijua Joyada leni Besodia bijua Mesulami den goa ki maa yaa buliñoabu n yi bu Buliñoakpelibu. Bi den pini bu ki caani ti buliñoaluoditi, ki tieni li bonluonkaala leni yaa daadi n poandi ki luondi.

⁷ Gabaono yua Melatia leni Melonoti yua Jadoni leni jatoaba yaaba n ñani Gabaono leni Mitisipa, yaaba n ñani u kpenciamu nintuali dociamu, den maa ki tugini bikani.

⁸ O maano Usieli, Hadaja bijua, den maa ki tugini bikani. Hanani, yua n ŋanbidi tulale mo den maa ki tugini o yaa kani. Ban den maa ki pundi u bilinu n piagi naani yeni, bi tuonli den gbeni Jelusalema.

⁹ Jelusalema dogu boagidima yudaano Lefaya, Huli bijua, den maa ki tugini bi yaa kani.

¹⁰ Halumafi bijua Yedaya den maa ki tugini bikani ki tiegi o diegu. Hasabinia bijua Hatusi mo den maa ki tugini o yaa kani.

¹¹ Halimi bijua Malikiya leni Pasati-Moabi yaa bijua Hasubi den maa bilinjenyenli leni mu Buamu Diefoagili.

¹² Jelusalema dogu boagidima yudaano Salumi, Halosesi bijua, den maa ki tugini bikani, wani leni o bisiaba.

¹³ Hanuni leni Sanoa dogu yaaba den maa yaa buliñoabu n yi ku Joaloangu Buliñoabu. Bi den maa bu ki caani ti buliñoaluoditi ki tieni li bonluonkaala leni yaa daadi n poandi ki luondi. Bi go den ŋanbi u bilinu nukpanduna tudili ki ban pundi hali ti Bugidi Buliñoabu.

¹⁴ Beti-Hakelemi dogu yudaano Malikiya, Lekobi bijua, den maa ti Bugidi Buliñoabu. O den maa bu ki caani ti buliñoaluoditi, ki tieni li bonluonkaala leni yaa daadi n poandi ki luondi.

¹⁵ Mitisipa dogu yudaano Saluni, Koli-Hose bijua den maa li ñinbunli Buliñoabu. O den maa bu ki pini bu, ki caani ti buliñoaluoditi, ki tieni li bonluonkaala leni yaa daadi n poandi ki luondi. O den goa ki ŋanbi yaa bilinu n kuu leni Siloe boangu, o bado sadinga leni Dafidi dogu ŋmaadokaani siiga.

¹⁶ Asibuki bijua Nehemi, yua n den tie Beti-Tisuli dogu boagidima yudaano, den maa ki tugini o yaa kani ki ban pundi hali Dafidi kula nintuali, hali ban den gbiidi yaa boangu kani, ki ban pundi hali o bado guudikaaba diegu kani.

¹⁷ Lefi buolu yaaba den maa ki tugini o kani: Bani bijua Lehumi leni Keyila dogu boagidima yudaano Hasabia yua n den soani o dogu po,

¹⁸ leni Keyila dogu boagidima yudaano Bafayi, Henadadi bijua,

¹⁹ leni Josue bijua Eseli Mitisipa dogu yudaano yua n den maa bilinjentoali ki tiegi ti toatiadi ŋmaadokaanu, i bilini n tuogi naani.

²⁰ Sabayi bijua Baluki den fiini o gbanu ki maa bilinjentoali ki tugini o yaa kani, ki cili i bilini n tuogi naani ki ban dagini bi kopadicianba bado Eliasibi diegu.

²¹ Hakotisi bijua Uli yaa bijua Melemoti den maa bilinjentoali ki cili Eliasibi diegu buliñoabu kani ki ban dagini ku diegu yeni bianu.

²² Yaa kopadicianba n kaakaa ki kuu Jelusalema den tugini o kani ki maa.

²³ Bi yaa puoli Benjamina leni Hasubi den maa bilinjenyenli ki kuu bi diedi. Anania bijua Maaseja yaa bijua Asalia den maa ki tugini bikani ki kuu o diegu.

²⁴ O puoli po Henadadi bijua Binuyi den maa bilinjentoali ki cili Asalia diegu kani ki ban pundi hali i bilini n tuogi naani.

²⁵ Usayi bijua Palali den maa ki tiegi i bilini n tuogi naani leni yaa diefoagili n kpedi ki cie ki ye o bado diegu nintuali, ki kuu li kpaadidieli luolu. Paleyosi bijua Pedaya den maa ki tugini o kani.

²⁶ U Tienu diegu naacenba yaaba n den ye Ofeli Ñianjaali, ki juaga po, den maa ki ban pundi hali yaa diefoagili n tuugi leni u bilinu ki ye mi Ñima Buliñoabu puoli po.

²⁷ Bi yaa puoli, Tekoa dogu yaaba den maa bilinjentoali ki tiegi yaa diefoagicianli n tuugi leni u bilinu, ki ban pundi hali Ofeli bilinu kani.

²⁸ Ki cili i Taami Buliñoabu kani, bi kopadicianba den maa ke yua kuli tiegi o diegu.

²⁹ Imeli bijua Tisadoki den tugini bikani ki maa o diegu nintuali kani. Puoli po yaa buliñoaguudo Sekania bijua Semayeja den tugini o yaa kani ki maa.

³⁰ Selemia bijua Hanania leni Tisalafi bijaluobilo Hanuni den maa bilinjentoali ki tugini bikani. Belekia bijua Mesulami mo den maa ki tugini bi yaa kani ki tiegi o dieli.

³¹ O maano Malikiya den maa ki tugini o kani ki ban pundi hali U Tienu diegu naacenba leni a kpenda diedi kani, ki tiegi Mifikodi Buliñoabu, ki go ban pundi hali ki logidiga tanpodieli.

³² Bi maaba leni a kpenda den maa ki logidiga tanpodieli leni i Pe Buliñoabu siiga.

Li tuonli suagi liiga baa ke yibalinba bua ki sieni li

³³ Sanbala n den gbadi ke tinba Jufinba goa ki maa u bilinu, o pali den fii ki beni hali boncianla ke o ñuadi ti

³⁴ ki yedi o kpiiba leni Samali toatieba nintuali: «Mu Jufi-janjadinmu mo tuuni be yo? Ti baa cedi ban yaa tuuni bi? Bi baa baa ki padi bi? Naani bi baa soani ki gbeni dinla bi? Mi fantama n siasia yaa tana ke a tangbana dogini ki piini a, bi go baa faadi a bi?»

³⁵ Amoni buolu yua Tobija den ye o kani. O den yedi: «Ban yaa maa be! Baa colo yaa doni ban maa yaa bilinu leni a tana yeni po, o baa lu u.»

³⁶ N den yaadi ki yedi: «Ti Tienu, a gbadi ban fali ti maama. Teni bi sugidi n goa ki jiidi bipo. Teni ban fie bi bonpiakaala ki gedini ba ti yonbidi.

³⁷ Da tieni bipo sugili bi *tuonbiadi po, da sundi bi tagili po kelima bi sugi tinba yaaba n maa u bilinu.»

³⁸ Ti den goa ki maa u bilinu yeni. Ti den maa ki gbeni i kaani kuli ki ban pundi u kpedima boagidima kelima yua kuli den kuani o yama li tuonli yeni niinni bonŋanla.