Nehemi 2 - Gourmanchéma Bible

¹ O bado Alitakiselisesi bali binpiiliedi binli, yaa ŋmaalo n yi Nisan yaa niinni, duven den se wani o bado nintuali ke n taa duven yeni ki teni o. N pali daa den kpa biidi o kani.

² O bado den yedi nni: «Be n teni ke a nunga biidi nande? A naa yia wani. Li baa li tie paboanli bebe lige.» Ti jawaanciandi den cuo nni,

³ ama n den goa ki yedi wani o bado: «Fini o bado n yaa ye ki fo hali yaa yogunu kuli. N nunga baa ga lede ki kan biidi n baanba kula n ye yaa dogu nni yaa bodi ke mi fantama dini u bilinciamu buliñoana?»

⁴ O bado den yedi nni: «A bua be?» N den jaandi ki mia U Tienu yua n die tanpoli,

⁵ ki goa ki yedi o bado: «Li yaa mani fini o bado, ke a pali mo mani mini a naacemo po, ŋan pa nni u sanu min gedi Juda po, n baanba kula n ye yaa dogu nni ki ban goa ki maa u.»

⁶ Li den sua ke o pua kaa o kani. O bado den buali nni: «A cenli baa waagi ki pundi hali be yogunu? A baa goa ki kpeni u laa yogunu?» O bado den tuo min gedi. N den bili o min baa goa ki kpeni yaa yogunu.

⁷ Lanwani n go den mia o bado ki yedi o: «Li yaa mani fini o bado, ŋan teni nni a tila yaa gufeneelinba n die u kpenciamu Yufilata nintuali po, ban cedi min poandi bi diema nni ki gedi Juda.

⁸ Ŋan go teni nni li tili Asafi po, yua n tie fini o bado fuaguudo, wan teni nni yaa daadi n baa dagidi yaa toaguudidieli n nagi U Tienu diegu kani yaa buliñoana po, leni u dogu bilinciamu po, leni min baa yaa ye yaa diegu nni po.» O bado den tuo ki teni nni laa tila kelima n Tienu nuu, yu n ŋani, den maa npo ki kubi nni.

⁹ O bado den teni ke bi toatieba yudanba leni bi tandanba ciani nni. N den gedi yaa gufeneelinba n die u kpenciamu Yufilata nintuali kani ki teni ba o bado tila.

¹⁰ Holoni yua Sanbala leni o duogili Tobija, Amoni buolu yua, n den gbadi ke n cua, li den biidi bi pala boncianla ke o nilo cua ki baa lingi Isalele yaaba ŋamu.

Nehemi gaani ki goandi Jelusalema bilini n tie maama

¹¹ N den pundi Jelusalema ki tieni likani dana taa.

¹² Lani yaa puoli n den fii ku ñiagu mini leni bi nitianba. N daa den waani niloba kuli n Tienu n kuani yaala n pali nni min tieni Jelusalema po. Min den jagi yaa ŋunbo yaaka, yantoaga kuli ki den ye leni nni.

¹³ Ku ñiagu n den tagini u bilinciamu buliñoabu, ku Joaloangu Buliñoabu kani, ki ñani u dogu nni, ki teli o Yaago Ninbunli leni ti Bugidi Buliñoabu. N den diidi Jelusalema bilinciami yi n mumudi, leni u buliñoana, mi fantama n den dini yaa.

¹⁴ N go den suagi liiga ki balini u dogu bilinciamu buliñoabu yaabu n yi li Ñinbunli Buliñoabu leni yaa boangu n yi o bado Boangu, ama sanu ki den ye n bonjaginkaala n baa tagi naani.

¹⁵ Lani yaa po, ku ñiagu yeni n den doni u kpenu, ki go diidi u dogu bilinciamu. N den goa ki kua u dogu bilinciamu buliñoabu yaabu n yi ku Joaloangu Buliñoabu kani ki kuni.

¹⁶ Li bali danba ki den bani min gedi naankani leni min tiendi yaala. Hali lanyogunu, n daa den yedi liba Jufinba bi bi kopadicianba bi bi paatieba bi li bali danba bi yaaba n baa yaa tuuni laa tuonli siiga nni baa niyendo.

¹⁷ N den yedi ba: «Yi laa tin ye leni yaa falaciamo. Jelusalema mumudi, mi fantama buoni u buliñoana. Cua mani tin goa ki maa Jelusalema bilinciamu ke tin da go ye leni i fe.»

¹⁸ Lanwani n den togidi ba U Tienu nuu, yu n ŋani, n den maa npo ki kubi nni maama, leni o bado n den maadi nni yaa maama. Bi den yedi: «Tin fii ki maa mani!» Bi den paagi bi pala ki baa tieni laa yanjagiŋanli.

¹⁹ Holoni yua Sanbala leni o duogili Tobija, Amoni buolu yua, leni Gesemi, Alabi buolu yua, n den gbadi tin jagi yaala, bi den ñuadi ti ki fali ti, ki yedi: «Yi tiendi be nne? Yi bua ki fiini o bado po mi janjanma yoo?»

²⁰ N den guani ba yaa maama n tie ne: «U Tienu yua n die tanpoli baa teni tin tuuni yaa tuonli n juodi bonŋanla. Tinba o naacenba, ti baa fii ki maa. Ama yinba, yii pia biinu, yii pia sanuba Jelusalema ne niinni. Bi kan tiadi yipo mo lienni.»