Nehemi 13 - Gourmanchéma Bible

¹ Laa yogunu bi den cogi Musa *bali maama tili nni ki laa ke li diani ke Amoni buolu yua leni Moabi buolu yua kan taani U Tienu niba siiga,

² kelima baa den tuogi Isalele yaaba ki puni ba mi jiema leni mi ñima, ki go den yini *Balaama ki suu o i ligi ke wan soli bani Isalele yaaba. Ama ti Tienu den lebidi ti solindi ke ti tua gaali.

³ Isalele yaaba n den gbadi li bali maama, bi den ñani bi nilanba kuli bi siiga.

⁴ Hali ke laa bonla daa tieni, bi den gandi o kopadiciamo Eliasibi ke wan yaa die U Tienu diegu diena maama. Nani wan den tie Tobija kpiilo yeni,

⁵ wani Eliasibi den ŋanbi ki teni o diecianli, ban den kpa kuandi naani bu paabu, a *dugibila, ti tiadi, leni yaa*ŋalikama leni yaa duvenpaano leni yaa kpama*dim ke li tie Lefi buolu yaaba, leni bi yanyanba leni a buliñoaguuda po. Bi go den kuandi ban ñandi yaala bi kopadicianba po moko laa dieli nni.

⁶ Mii den ye Jelusalema laa bonla kuli n den tieni yaa yogunu, kelima n den goa ki gedi Babilona bado Alitakiselisesi po o bali piitaa n binlieli binli. Li binli juodima o den puni nni u sanu

⁷ ke n guani Jelusalema. N den laa Eliasibi n tieni yaa bonbiadila ki teni Tobija li dieli U Tienu diegu luoli nni.

⁸ N pali den fii hali boncianla ke n taa Tobija n die yaa tiadi kuli ki ñani li dieli nni ki luni niinpo.

⁹ N den teni ke bi ŋanbi a diena ke n goa ki bili U Tienu diegu tiadi leni bu paabu leni a dugibila.

¹⁰ N go den gbadi ke baa tendi Lefi buolu yaaba lan bili ban yaa tendi ba yaala, ke bani leni bi yanyanba, yaaba n den kubi U Tienu diegu tuonli mo, den sani ke yua kuli gedi o kuanu po.

¹¹ N den funi leni li bali danba ki yedi ba: «Be yaa po ke yi ŋa U Tienu diegu?» N den yini ki taani Lefi buolu yaaba leni bi yanyanba ki goa ki kuani ba bi tuonli nni.

¹² Lanwani Juda buolu yaaba den cuani ti tiadi n bili yaa diena nni ŋalikama, duvenpaano leni ni kpama yaa dim.

¹³ N den guuni o kopadiciamo Selemia leni li*bali maama bangika Tisadoki leni Lefi buolu yua Pedaya ti tiadi n bili yaa diena nni. Matania yaabili Hanani, Sakuli bijua den pugidi bipo, kelima bikuli den tie ban dugi yaaba yaa po. Bi tuonli den tie ban yaa boagidi bu paabu bi lieba.

¹⁴ «N Tienu ŋan tiadi npo kelima laa bonla po, ŋan da sundi min soani leni a fangili maama a diegu nni leni ŋan bili tin yaa ŋua yaala kuli niinni.»

¹⁵ Laa yogunu n den laa Juda diema nni ke bi niba ŋmaadi i duven tiidi bonluonkaala duven ŋanbikaanu *U Tienu fuodima daali. Bi tianba den kuandi a ŋalikama baba, ki tungi i ŋunbi duven, duven tiidi bonluonkaala, a kankana leni bonbuolu kuli ki caani Jelusalema U Tienu fuodima daali. N den funi leni ba ban kuadi bi kuadima yaa daali.

¹⁶ Tili yaaba, yaaba n den ye Jelusalema moko den kpendi nni i jami leni bonkuadibuolu kuli ki kuadi Juda buolu yaaba po U Tienu fuodima daali Jelusalema nni.

¹⁷ N den funi leni Juda niciama ki yedi ba: «Yin tiendi yaa tuongunda ki cagini U Tienu fuodima daali ne mo bua ki yedi be?

¹⁸ Yi yaajanba ki den tieni yeni kaa? Lani yaa po ka ke U Tienu cuani yaa fala n tie ne tinba leni u dogu na po? Yinba mo go cagini U Tienu fuodima daali ki didi baa teni o pali n fii Isalele yaaba po.»

¹⁹ Lane n den bili ke ban yen luoni Jelusalema buliñoana u yienu n kua yaa yogunu, hali ke U Tienu fuodima daali daa cili ki da luodi a mo ke U Tienu fuodima daali daa pendi. N den siensieni n naacenba a buliñoana kani ke ban da tuo tugiliba n kua u dogu nni U Tienu fuodima daali.

²⁰ Lanwani a kpenkpenda leni yaaba n kuadi bonkuadibuolu kuli den dua niinpo yenma bi milie.

²¹ N den funi leni ba ki yedi ba: «Be yaa po ke yi dua u bilinu puoli? Yi yaa go tieni yeni kuli, n baa cuo yi.» Hali laa yogunu, baa go cua U Tienu fuodima daali.

²² N go den bili ke Lefi buolu yaaba n ŋanbi biba ki cua ki yaa guu a buliñoana ki gagidi ki ŋanbi U Tienu fuodima daali. «N Tienu ŋan tiadi npo kelima laa bonla po, ki kubi nni kelima a niñingbadicianma po.»

²³ Laa yogunu n den laa yaa Jufinba n taa yaa puoba n tie Asidodi dogu yaaba leni yaa puoba n tie Amoni buolu yaaba leni Moabi buolu yaaba.

²⁴ Bi bila siiga boagidima den bani Asidodi yaaba mabuolu, bi tianba mo den bani mabotoe, ama oba kuli ki den bani Jufinba yaa mabuolu.

²⁵ N den funi leni ba ki soli ba. N den pua bi siiga bi tianba ki ŋabi bi yudi, ki teni ke bi poli hali U Tienu po ke bi kan go pa bi bisiaba bi nilanba bijaba ki kan go taa bi nilanba bisiaba bi bijaba po bi bi yula po mo.

²⁶ N den yedi ba: «Isalele yaaba bado Salomono ki den tieni ti *tuonbiadi laa bonla nni ka? I nilanbuoli kuli siiga ki den pia yaa bado n naani leni o. U Tienu den bua o ki teni ke o tua Isalele yaaba kuli bado. Ama baa yeni bi nilanpuoba den kuani o ti tuonbiadi nni.

²⁷ Tii go bua ki gbadi ke yi tiendi laa tudicianma ti Tienu po ki taani bi nilanpuoba.»

²⁸ Joyada bijua yendo, yua n den tie o kopadicianba bado Eliasibi yaabili, den cuadi Holoni yua Sanbala. N den deli o ki foagidi n kani.

²⁹ «N Tienu, ŋan tiadi bipo, kelima bi cagini li padili tuonli leni ŋan den kuani yaa *ŋantaado fini leni bi kopadicianba leni Lefi buolu yaaba siiga.»

³⁰ N den ñani nilamo kuli Isalele yaaba siiga ki ŋanbi ba. N den ñii bonŋanla yaa balimaama n bili kopadiciamo kuli leni Lefi buolu yaaba yua kuli n baa yaa tiendi yaala o tuonli nni,

³¹ leni Isalele yaaba n tendi ti daadi yaa yogunu leni li bonluonka-kpiala kuli. «N Tienu, ŋan tiadi npo ki mangi npo a nunga.»