Nehemi 12 - Gourmanchéma Bible

¹ Bi kopadicianba leni Lefi buolu yaaba, yaaba n den ñani ti yonbidi ki yegi leni Seyalitieli bijua Solobabeli leni Josue ki goa ki kpeni nne: Selaja, Jelemi, Esidilasi,

² Amalia, Maluki, Hatusi,

³ Sekania, Lehumi, Melemoti,

⁴ Ido, Ginetoyi, Abiya,

⁵ Mijamini, Maadia, Biliga,

⁶ Samayeja, Joyalibi, Yedayeya,

⁷ Salu, Amoki, Hilikiya leni Yedayeya. Bani n den tie bi kopadicianba leni bi kpiiba yudanba, Josue yogunu.

⁸ Lefi buolu yaaba den tie: Josue, Binuyi, Kadimieli, Selebia, Juda leni Matania yua n den gobidi ti pagidi yani wani leni o diegu yaaba.

⁹ Bakibukia leni Uni den se bi nintuali ki todi ba.

¹⁰ Josue den mali Yeojakimi, Yeojakimi n maa Eliasibi, Eliasibi n maa Joyada,

¹¹ Joyada n maa Jonatan, Jonatan mo n maa Jadua.

¹² Bi kopadicianba bado Yeojakimi yogunu, yaaba n den tie bi kopadicianba diedanba nne: Selaja diegu nni, Melaja n den tie o diedaano, Jelemi diegu nni Hanania.

¹³ Esidilasi diegu nni Mesulami, Amalia diegu nni Yohanana.

¹⁴ Meluki diegu nni Jonatan, Sebania diegu nni Josefi,

¹⁵ Halimi diegu nni Adina, Melayoti diegu nni, Helikayi.

¹⁶ Ido diegu nni Sakali, Ginetoni diegu nni Mesulami.

¹⁷ Abiya diegu nni Sikili, Minjamini leni Moadia diegu nni Pilitayi.

¹⁸ Biliga diegu nni Samua, Semayeja diegu nni Jonatan.

¹⁹ Joyalibi diegu nni Matinayi, Yedayeya diegu nni Usi.

²⁰ Salayi diegu nni Kalayi, Amoki diegu nni Ebeli.

²¹ Hilikiya diegu nni, Hasabia, Yedayeya diegu nni, Netaneeli.

²² Bi kopadicianba bado Eliasibi yogunu leni bi kopadicianba bado Yohanana yogunu leni bi kopadicianba bado Jadua yaa yogunu, bi den diani Lefi buolu yaaba bi diedanba leni bi kopadicianba yela Pelisa bado Daliyusa bali yogunu.

²³ Lefi buolu yaaba diedanba yela den diani daali kuli jama tila nni hali Eliasibi yaabili Yohanana yogunu.

²⁴ Lefi buolu yaaba yudanba Hasabia, Selebia leni Kadimieli bijua Josue tuonli den tie ki yaa se ki tiegi bi kpiiba ki yiini ki kpiagidi ki go pagi Li Miali Diedo bi yaa yogunu yaa pundi, nani U Tienu nilo Dafidi n den bili maama.

²⁵ A buliñoaguuda Matania, Bakibukia, Abidiasi, Mesulami, Talimona leni Akubi tuonli den tie ban yaa guu ban biliti ti tiadi yaa diena nni a buliñoana kani.

²⁶ Bi den ye Jotisadaki bijua Josue bijua Yeojakimi yogunu leni gufeneeli Nehemi leni Esidilasi yua n den tie o kopadiciamo leni li *bali maama bangika yaa yogunu.

Jelusalema bilini gagidima jaanma

²⁷ Jelusalema bilini gagidima *jaanma yogunu, bi den yini Lefi buolu yaaba ban ye naankani kuli ki cuani ba Jelusalema ke ban jaani i bilini gagidima jaanma leni ti pagidi leni i yani, ki pua mu lonmu, ti kogiditi leni ti kogidiciandi.

²⁸ Bi yanyanba den ñani Jelusalema gaani lindima leni Netofa dobila nni,

²⁹ leni Beti-Giligali leni Geba leni Asimafeti yaa dogi nni ki taani, kelima bi den maamaa a dobila Jelusalema lindima.

³⁰ Bi kopadicianba leni Lefi buolu yaaba den gagidi ki ŋanbi biba, ki go gagidi ki ŋanbi Isalele yaaba leni u dogu buliñoana leni u bilini.

³¹ N den teni ke Juda buolu yaaba yudanba doni u bilinu po. N den boagidi yanyancagiciama lie. Li cagikpiali den cuoni u bilinu po jienu po, ki tiegi ti Bugidi Buliñoabu.

³² Hose leni Juda buolu yaaba yudanba boagidima den cuoni bi yaa puoli po,

³³ leni Asalia, Esidilasi, Mesulami,

³⁴ Juda, Benjamina, Semayeja, Jelemi,

³⁵ bi kopadicianba leni bi kakacinba, leni Asafi yaabili Sakali. Asafi den mali Sakuli, Sakuli n maa Mise, Mise n maa Matania, Matania n maa Semayeja, Semayeja n maa Jonatan, Jonatan mo n maa wani Sakali.

³⁶ Sakali den ŋua, wani leni o kpiiba Semayeja, Asaleeli, Milalayi, Gilalayi, Maayi, Netaneeli, Juda leni Hanani ki tugi U Tienu nilo Dafidi baantiadi. Li balimaama bangika Esidilasi den ye bi liiga.

³⁷ Ban den pundi li Ñinbunli Buliñoabu kani, bi den sua ke bi ye Dafidi dogu dojiidikaanu nintuali. Bi den doni u bilinu dokaanu kani. Bi den kpedi ki caadi Dafidi badi diegu ki cuoni ki ban pundi hali mi Ñima Buliñoabu, u dogu puoli.

³⁸ Li cagilieli den tagini ganu po. N den ŋua bi puoli, u bilinu po, mini leni Isalele yaaba boagidiliema. Ti den tagini ki ñani mu Buamu Diefoagili kani, leni u bilinu n piagi naani,

³⁹ leni Efilayima Buliñoabu leni bu Buliñoakpelibu, leni i Jami Buliñoabu kani, leni Hananeeli Diefoagili leni Meya yaa Diefoagili kani, ki ban ñani hali i Pe Buliñoabu kani. Ti den ban sedi li kpaadidieli Buliñoabu kani.

⁴⁰ A yanyancagilieda yeni den sedi U Tienu diegu nni. Mini leni li bali danba yaaba n den yegi leni nni moko den sedi

⁴¹ leni bi kopadicianba Eliakimi, Maaseja, Minjamini, Mise, Eliyonayi, Sakali leni Hanania yaaba n den kubi kakacinba,

⁴² leni Maaseja, Semayeja, Eleyasala, Usi, Yohanana, Malikiya, Elami leni Eseli. Bi yanyanba den yini. Jisilakija den gobidi ba.

⁴³ Laa daali bi den padi a pada boncianla ki mangi bi pala kelima U Tienu den puni Isalele yaaba li pamancianli. Bi puoba leni a bila moko den mangi bi pala. Lane bi niba den gbadi Jelusalema pamanli kpaani hali foagima.

Bi kopadicianba leni Lefi buolu yaaba biini

⁴⁴ Laa daali bi den teni ke bi niba guu bu paabu leni ki tinga bonluonka-kpiala leni ban ñandi yaa *dim n bili yaa diena nni. Bi den puogi ba ban yaa gaani ki biliti lienni i tinkundogi kpaandi, li bali maama n bili ban yaa tendi bi kopadicianba leni Lefi buolu yaaba yaala. Juda buolu yaaba pala den mani ke bi kopadicianba leni Lefi buolu yaaba kubi bi tuonli

⁴⁵ ki kubi U Tienu tuonli leni mi gagidiŋanbima yaa tuonli. Bi yanyanba leni a buliñoaguuda moko den kubi bi tuona nani Dafidi leni o bijua Salomono n den bili maama,

⁴⁶ kelima hali yogu Dafidi leni Asafi yogunu, li den pia bi yanyanba yudanba yaaba n gobidi ti pagidi yani leni i tuondi yani U Tienu kpiagidi po.

⁴⁷ Solobabeli yogunu leni Nehemi yaa yogunu kuli Isalele yaaba kuli den teni bi yanyanba leni a buliñoaguuda bi biini daali kuli. Bi den tendi Lefi buolu yaaba moko yaala n gagidi ke bimo tendi Alono yaabila bi kopadicianba bi yaa biinu.